«Ալեն, դու ի՞նչ գիտես՝ պատերազմն ինչ ա, բանակն ինչ ա, բլոկադան ինչ ա, նկուղում ապրելն ինչ ա»։ Այս մասին սոցցանցերում տեսանյութ է հրապարակել 2023 թվականի սեպտեմբերի 19-ին Ադրբեջանի սկսած պատերազմի հետևանքով զոհված զինծառայող Տիգրան Ավետիսյանի մայրը՝ Ադելինա Ավետիսյանը։
ԱԺ նախագահ Ալեն Սիմոնյանն այսօր՝ ԱԺ–ում ճեպազրույցի ժամանակ արցախցի լրագրողի՝ հայրենիք վերադառնալու հնարավորության մասին հարցին ի պատասխան ասել էր՝ «մնայիք, կռվեիք»։
«Կիսասոված զինվորը կանգնի մինչև վերջ իր հայրենիքը պաշտպանի, 120 հազար մարդու համար հոգ տանի, որ ցեղասպանություն տեղի չունենա, դու ի՞նչ գիտես դրա մասին, որ ասում ես կռվեիք մինչև վերջ»,–ասել է զոհվածի մայրը։
***
Ստեփանակերտի Կոմիտասի անվան երաժշտական դպրոցի տնօրեն Զարինե Բաբայանը, ով 2023 թ. սեպտեմբերյան դեպքերի ժամանակ կորցրել է որդուն, արձագանքել է նախօրեին ԱԺ նախագահ Ալեն Սիմոնյանի հայտարարությանը՝ ի պատասխան արցախցի լրագրոցի հարցին։
«Ալեն Սիմոնյան, դուխով տղա, ես քեզ այսօր 11-ից սպասում եմ Եռաբլուրում, իմ որդու ու իր ընկերների շիրիմի մոտ, ովքեր զոհվել են սեպտեմբերին, 2023 -ին։ Միասին կհաշվենք, մի օրում, քանի զոհ է տվել մենակ մնացած Արցախը»,- գրել է Զ. Բաբայանը։
Հիշեցնենք, որ Ալեն Սիմոնյանը, ի պատասխան արցախցի լրագրողի հարցի, ասել էր. «Որովհետև երբ որ դուք դուրս եկաք այդտեղից, անվտանգ չէր։ Չնայած կարելի էր մնալ ու մինչև վերջ պայքարել այն զենքերով, որոնք Հայաստանը թողել և տվել էր, քաղաքական սատարումով, բայց դուք դուրս եկաք։ Պետք էր կռվել»։
Լրագրողի դիտարկմանը, որ մարդիկ մորթվում էին, Սիմոնյանը կրկնեց. «Պետք էր կռվել։ Պետք էր կռվել։ Հայաստանը կռվել է, պետք էր կռվել»։