Տեսնում ենք, որ Նիկոլ Փաշինյանը հայտնվել է տոտալ փակուղում և նրա ոչ ադեկվատ հոգեվիճակը, երբ Մյունխենում անվտանգային կարևոր համաժողովում, որտեղ ԱՄՆ փոխախագահն ուղղակիորեն ջախջախում է նաև «նիկոլիզմ» գաղափարախոսությունը, ուղղակիորեն թքում է ԵՄ վրա՝ ասելով, որ ձեր ֆեյք ժողովրդավարությունն է հիմնական թշնամին, որ ձեր խնդիրը ոչ թե ՌԴ-ն կամ Չինաստանն է, այլ՝ ֆեյք ժողովրդավարությունը՝ բերելով հստակ օրինակներ, թե ինչպես Ռումինիայում ուղղակի չեղարկեցիք ընտրության արդյունքները, որովհետև դրանք ձեզ հարմար չէին։ Այս մասին լրագրողների հետ զրույցում ասաց Նաիրա Զոհրաբյանը։
«Այդ ելույթի ժամանակ ես նայում էի դահլիճում նստած ԵՄ լիդերների դեմքին, գիտեք՝ սա գիտակցում էր, որ ֆեյք դեմոկրատիզմի էպոխան ավարտվել է, երբ պատերազմից հետո ԵՄ բարձրաստիճան ներկայացուցիչներից մեկն ասաց, որ եթե Նիկոլ Փաշինյանն ուղիղ եթերում զինվոր էլ ուտի, ասելու ենք՝ ժողովրդավարության պիկն է»,- ասաց Զոհրաբյանը՝ համոզմունք հայտնելով, որ Նիկոլ Փաշինյանը վախենում է հրապարակել նախկին բանակցային փաթեթները, սակայն դա միևնույն է՝ գաղտնազերծվելու են։
Զոհրաբյանն ընդգծեց՝ ողջ քաղաքական դաշտը պահանջում է՝ հրապարակել ողջ բանակցային փաթեթները։
«Որ ասում է՝ ոնց գտնեմ, մեկը՝ սառնարանի ոտքի տակ է, մյուսը՝ կոնդիցիոների մեջ է։ Բա որ Կապանում հանել, թափահարում էիր, նշանակում է՝ հանել էիր օդորակիչի մեջից, օրինակ, Մադրիդյան սկզբունքները։ Լավ, քո պաշտոնը ստանձնելուց հետո՝ 1 տարի հետո՝ 2019թ․ ապրիլինի, համանախագահների կողմից եղել է առաջարկ, որը դու դավադրաբար թաքցրել ես ժողովրդից, ասել ես՝ ոչ մի բան էլ չեմ բանակցում, ինչ ուզում՝ բանակցում եմ, բանակցում եմ իմ զրոյական կետից, ոչ մի առաջարկ էլ չկա, մինչդեռ, 2019թ հունիսին քեզ ներկայացվել է ապրիլյան առաջարկի մոդիֆիկացված տարբերակը, որով ԼՂ-ն, Լաչինի և Քարվաճառի բոլոր շրջանները մնում էին հայկական վերահսկողության տակ, իսկ վերադարձված 5 շրջաններում տեղակայվում խաղապահներ, տարիներով՝ մինչև հանրաքվեի ժամկետի հստակեցումը, ինչը նշանակում է, որ ԼՂ-ն հայկական էր մնալու»,- ասաց Նաիրա Զոհրաբյանը՝ նշելով, որ դեռևս 2020թ․ պատերազմի առաջին օրերին փակ նիստ է հրավիրվել, Արարատ Միրզոյանն ասել է՝ կա առաջարկ, ասել է՝ «Լավրովյան առաջարկն է, կարո՞ղ է դրան ենք համաձայնելու»։ Զոհրաբյանն ընդգծեց՝ դա հանցագործություն է, ապա, դիմելով խորհրդարանական ընդդիմությանը՝ հորդորեց նրանց դիմել համանախագահներին՝ փաստաթուղթը հրապարակելու պահանջով։
«Այդ փաստաթուղթը մի կողմ շպրտելով՝ ինքը բերել է պատերազմ՝ քաղաքական անմեղսունակության արդյունքում, թե պայմանավորված, բայց սա դառնալու է «Հայկական Նյուրենբերգ»։ Նիկոլ, տղա ես, հրապարակի 2019թ․ փաստաթուղթը»։