ՌԴ Անվտանգության խորհրդի փոխնախագահ Դմիտրի Մեդվեդեւն իր Telegram-ալիքում մեկնաբանել է Սպիտակ տանը ԱՄՆ եւ Ուկրաինայի նախագահների սկանդալային բանակցությունները՝ միջադեպն անվանելով «դաժան քոթակ Օվալաձեւ աշխատասենյակում»։
«Առաջին անգամ Թրամփը կոկաինային ծաղրածուի երեսին ասաց ճշմարտությունը։ Կիեւի ռեժիմը խաղում է երրորդ համաշխարհային պատերազմի հետ։ Իսկ անշնորհակալ խոզը խոզանոցի տերերից ուժգին ապտակ ստացավ։ Սա օգտակար է։ Բայց բավարար չէ. նացիստական մեքենայի ռազմական օգնությունը պետք է դադարեցվի»,- գրել է նա։
Հիշեցնենք, որ երեկ բանակցությունների ընթացքում ԱՄՆ եւ Ուկրաինայի նախագահները սկսել են բարձրաձայն խոսել։ Թրամփը Զելենսկուն մեղադրել է երախտամոռության մեջ։ Վեճին միացել է նաեւ ԱՄՆ փոխնախագահը։
Ավելի ուշ Թրամփը հայտնել է, որ Զելենսկին պատրաստ չէ խաղաղության։
Որոշ ժամանակ անց Թրամփ-Զելենսկի մամուլի ասուլիսը չեղարկվել է, իսկ հանքանյութերի գործարքը՝ հետաձգվել։
Ավելի ուշ ԱՄՆ պետքարտուղար Մարկո Ռուբիոն հարցազրույց է տվել CNN-ին, որի ժամանակ հայտնել է, որ Ուկրաինայի նախագահը պետք է ներողություն խնդրի ԱՄՆ նախագահից։ Միաժամանակ, Ուկրաինայի նախագահը Fox News-ի հարցազրույցում ասել է, որ հարկ չի համարում ներողություն խնդրել Դոնալդ Թրամփից։