Ադրբեջանի նախագահ Իլհամ Ալիևը, խոսելով Հայաստանի հետ հնարավոր խաղաղության մասին, հայտարարել է, որ Հայաստանի հետ խաղաղության պայմանագրի բոլոր կետերը հավասարապես կարևոր են և չեն կարող տարանջատվել։
«Դա է պատճառը, որ մինչ օրս մերժել ենք Հայաստանի առաջարկը և համաձայնեցված կետերի տակ չենք ստորագրել, մինչև ամբողջական տեքստի վերջնական տարբերակի շուրջ համաձայնության չգանք»,-նշել է Ալիևը։
Ադրբեջանական լրատվամիջոցները գրում են, որ դեռևս հայտնի չէ ստորագրման օրն ու վայրը և այդ մասին դեռ քննարկումներ չկան։
«Խաղաղության հասնելու լուրերին զուգահեռ՝ Բաքվի «Minval․az» լրատվական գործակալությունը սենսացիոն լուր է տարածել, որ Ալիևը նպատակ ունի ստեղծել ադրբեջանական 2-րդ հանրապետությունը, որը կոչվելու է Արևմտյան Ադրբեջան կամ «Իրեվանի Հանրապետություն»։ Որտե՞ղ պետք է ստեղծվի այդ պետությունը, երբ արդեն դրա քարտեզներն են սոցիալական ցանցերով հրապարակվում»,-MediaHub-ի հետ զրույցում ասում է հասարակական գործիչ Գեորգի Իսրայելյանը։
Ինչպե՞ս է այս մեդիագրոհին պատասխանում Հայաստանը։
«Փաշինյանը դեռ իրեն քվե տված ժողովրդի համար դեռ Ալիևի ստորագրությունն է մուրում, ընդամենը, որը կլինի 2026-ի ընտրություններին ընդառաջ իր հաղթաթուղթը»։
Իսրայելյանի խոսքով՝ Արևմտյան Ադրբեջան ունենալու ախորժակն Ալիևի մոտ սկսվել է 2020 թվականի նոյեմբերի 9-ից հետո, երբ պետական մակարդակով ձևավորվել է հանձնախումբ, որոնք զբաղվում են «պատմական հայրենիք» վերադարձի իրենց քաղաքացիների իրավունքով։
«Խորհրդային ժամանակահատվածում Հայաստանում, այո՛, ապրում էին հազարավոր ադրբեջանցիներ, նույնը՝ նաև Ադրբեջանում և Խորհրդային այլ երկրներում էին հայեր ապրում։ Սակայն, 88-ի հայտնի կոտորածներից ու Խորհրդային միության փլուզումից հետո՝ ամեն ինչ փոխվեց։ Մենք հասկացանք, որ գազանի հետ համակեցություն հնարավոր չէ։ Ես չեմ ասում դա լավագույն տարբերակն էր, սակայն, այդ օրերի համար միակ փրկությունն էր։ Այդ դեպքերից տասնամյակներ անց, ադրբեջանցիները ոչ թե համակեցություն են համոզում մեզ՝ այլ պարտադրում։ Դեռ ավելին, ՀՀ ապիկար իշխանությունների ձեռքերով քանդելու են մեր պետությունը։ Ադրբեջանցիները կօգտվեն Փաշինյանի անճարությունից ու փախստականների վերադարձի հիմքի վրա կստեղծեն «Իրեվանի Հանրապետությունը», այլ հարց է թե ինչ փաթեթավորմամբ դա կներկայացվի հայ հանրությանը»,-եզրափակեց մեր զրուցակիցը։