Ես՝ որպես զինվորական, ես կարող եմ ասել, որ ո՞վ է ուզում ավելի շատ խաղաղություն, եթե ոչ այն կառույցը, որը կարող է առաջինը տուժել պատերազմական իրավիճակից, բայց Ադրբեջանի կողմից դա խաբկանք է, որովհետև իրենք խաղաղության պայմանագրի մեջ այնպիսի կետեր են դրել, որոնք ցույց են տալիս, որ Հայաստանի վրա ճնշումը և պահանջները շարունակական են լինելու։ Այս մասին Աժ-ում հայտարարեց «Հայաստան» խմբակցության ղեկավար Սեյրան Օհանյանը։
«Երբ դրանք զուգորդվում են նաև կրակոցներով սահմանի վրա, սա ցույց է տալիս, որ այդ փաստաթուղթը իրատեսական չէ, իրական չէ խաղաղությունը։ Ընդ որում՝ բացի այն կետերից, որոնք կան խաղաղության պայմանագրում, նաև կան չգրված կետեր։ Պահանջում են, դրանք կատարել։ Ադրբեջանն ասում է՝ փոխեք ձեր սահմանադրությունը, հրաժարվեք Մինսկի խմբից, դրանից հետո մենք կտեսնենք՝ կգնանք խաղաղության, թե չենք գնա խաղաղության»։
Նա ընդգծեց, որ ՀՀ իշխանությունները ամեն գնով ուզում են ստանալ այդ թղթի կտորը, որպեսզի այն օգտագործեն ներքաղաքական գործընթացներում։ «Մինչդեռ, Ադրբեջանը պայմանագրի ստորագրումը ձգձգումը է, որպեսզի միջազգային, իրավական հիմքեր ստեղծեն և օգտվելով հետագայում աշխարհաքաղաքական զարգացումներից, ուժային կենտրոնների միջև հարաբերություններից, տարածաշրջանում իրադարձություններից՝ դրանից օգտվելով Հայաստանի Հանրապետության նկատմամբ ճնշումները մեծացնեն։ Նվազագույնը որ կարող են ստանալ՝ «միջանցքի» գաղափարի իրականացումն է։
Անդրադառնալով կրակոցներին, որոնք ըստ ՊՆ-ի՝ ՀՀ-ի համար վտանգավոր չեն՝ Օհանյանն ասաց, որ լինում են կանոնավոր, ուղղորդված, կրակոցներ, լինում են դիպուկահարների կրակոցներ, որոնք ուղղված են ՀՀ դիրքերի վրա և լինում են անկանոն կրակոցներ։ «Միևնույն է, ինչպիսի կրակոց էլ կան, այդ կրակոցների մասին տեղեկություններ պետք է լինեն, եթե անգամ կրակոցներ են լինում, հենց Ադրբեջանի Հանրապետության դիրքերում՝ իրենց զինծառայողների միջև։
Այս կրակոցների հիմնական նպատակը, ինչպես նաև կրակոցների մասին ապատեղեկատվությունը Ադրբեջանի կողմից տեղեկատվական պատերազմի մաս են կազմում։ Դրանք ուղղված են և ՀՀ ժողովրդի նկատմամբ հոգեբանական ճնշումներ իրականացնելուն, և ուղղված են ՀՀ իշխանություններին, առ այն՝ որ արագացրեք այն մեր պահանջները, որ մենք բացի խաղաղության պայմանագրից ներկայացնում ենք ձեզ, որպես այդ խաղաղության պայմանագիրը ստորագրենք։
Բայց քաջ ծանոթ լինելով Ադրբեջանի ռազմաքաղաքական ղեկավարության հոգեբանությանը՝ ուզում եմ ասել, որ իրենք փորձելու են մաքսիմալը կորզել և իրենք չեն գնալու հիմա խաղաղության գործընթացը իրականացնելու»։
Օհանյանն ասաց, որ ՊՆ-ն ինքը պետք է հետաքրքրված պետք է լինի ճիշտ ինֆորմացիա փոխանցելու։ «Երեկ ՊՆ ղեկավարությունը ասաց , որ անկանոն կրակոցներ են, բայց մենք ինֆորմացիա ունենք Խնածախ, Վաղատուր գյուղերից, որ կրակոցները գյուղի վերևով են անցնում։ Այս ինֆորմացիան պետք է հստակ տրվի։ Այսինքն, հստակ ինֆորմացիա չեն տալիս»։