Միգրանտների երեխաները նախքան ռուսական դպրոցներ ընդունվելը պետք է անցնեն թեստավորում, որը հաստատում է կրթական ծրագրերը յուրացնելու համար անհրաժեշտ ռուսաց լեզվի տիրապետման մակարդակը։
Օրենքը, որն արգելում է միգրանտների՝ ռուսերեն չտիրապետող երեխաներին դպրոց ընդունել, ուժի մեջ է մտնում ապրիլին։ Այս մասին հաղորդում է ՏԱՍՍ գործակալությունը:
Ռուսաստանի Դաշնության կրթության նախարարությունը հաստատել է թեստավորման անցումը կարգավորող հրամանները: Այսպես, այն կանցկացվի բանավոր և գրավոր, բացառությամբ առաջին դասարան ընդունվողների հարցում. նրանց համար կիրականացվի միայն բանավոր թեստավորում։
Աշխատանքը տեղի կունենա հանրակրթական կազմակերպություններում, որտեղ կկազմակերպվի թեստավորում անցնելու կետ։ Ամբողջ ընթացակարգը պետք է տեսագրվի, իսկ երեխայի բանավոր պատասխանները պետք է ձայնագրվեն ձայնագրող սարքերի միջոցով:
Թեստավորումը հաջողությամբ անցնելու դեպքում երեխան կընդունվի դպրոց, իսկ անհաջող անցնելու դեպքում նրան կառաջարկվի ռուսաց լեզվի լրացուցիչ ուսուցում։ Կրկին թեստավորում անցնել կարելի կլինի ոչ շուտ, քան երեք ամիս անց:
ՌԴ կրթության նախարար Սերգեյ Կրավցովը 2024 թ. նոյեմբերի վերջին հայտնել է, որ Ռուսաստանում նախատեսվում է ստեղծել ռուսաց լեզվի ուսումնասիրման կենտրոններ, որտեղ կարող են սովորել միգրանտների երեխաները. ենթադրաբար, դա կտևի երկու-երեք տարի:
Ավելի վաղ Ռուսաստանի կրթության ակադեմիայի նախագահ, ՌԴ կրթության նախկին նախարար Օլգա Վասիլևան ՏԱՍՍ-ին հայտնել էր, որ միգրանտների երեխաներին ռուսաց լեզվի իմացության թեստավորման մասին օրենքը շատ բանով կնպաստի կրթական ամբողջ համակարգի որակի բարձրացմանը: