Համացանցում տեսանյութ էր տարածվել, թե ինչպես են պարեկների մի քանի հաշվարկներ, հարձակվում խցանման մեջ կանգնած մեքենայի վարորդի վրա, ուժի կիրառմամաբ դուրս հանում նրան մեքենայից, պառկեցնում ասֆալտին և տանում ոստիկանության բաժանմունք։
Այդ վարորդը մեկն էր խցանման մեջ կանգնած բազմաթիվ այլ վարորդներից, որոնք ազդանշան տալով իրենց բողոքն էին հայտնում Նիկոլ Փաշինյանի շարասյան երթուղին ապահովելու համար երկար ժամանակ երթևեկությունը պարալիզացնելու երևույթի դեմ։
Սահմանադրագետ Գոհար Մելոյանը դեպքի կապակցությամբ գրեց. «ՀՀ Ոստիկանություն, պահանջում եմ այս անհավասարակշիռ« իրավապահների հակաիրավական վարքագծի արձանագրում և հետևանք՝ պատասխանատվության տեսքով։
Այս ինչ հիստերիա է
Եթե մարդն իրավախախտում է կատարել, թող արձանագրեն ու պատասխանատվության ենթարկեն։
Անհամաչափ ուժի կիրառումը՝ մարդու հիմնարար իրավունքների ոտնահարմամբ անընդունելի է և անթույլատրելի, ի վերջո՝ հանցավոր արարք։
Համազգեստն արտոնություն չէ, պատասխանատվություն է!»։
Գիշերը, ուշ ժամին ՀՀ ՆԳՆ Ոստիկանությունը պարզաբանում տարածեց,որումասվում էր.
«Սոցկայքերում պարեկների մասնակցությամբ տարածված տեսանյութի առնչությամբ հայտնում ենք, որ պետական արարողակարգային միջոցառումների շրջանակում, երբ ոստիկանության ծառայողները ապահովել են մեքենաների շարասյան անցումը, վարորդներից մեկը հայհոյանք է հնչեցրել:
Նա բերման է ենթարկվել Համայնքային ոստիկանության Կենտրոնական բաժին: Պարզաբանումներից հետո ազատ է արձակվել»:
Փաստաբան Ռուբեն Մելիքյանն արձագանքեց Ոստիկանությանը։
«Այս զարմանահրաշ պարզաբանումը թարգմանաբար նշանակում է հետևյալը.
«Թանկագի՛ն բարեկամներ,
Մենք ոչ թե Հայաստանի Հանրապետության ներքին գործերի նախարարություն ենք, այլ նիկոլ փաշինյանի հաստատած հակահայ ու հակաիրավական ռեժիմի զինված պահակախումբ։ Ուստի երբ որ պետք է՝ պատրաստ ենք օրենքի խախտմամբ ուժ կիրառել ռեժիմի խաթրին կպնող մարդկանց նկատմամբ, նվաստացնել, ստորացնել, խոշտանգել նրանց։ Մենք անպատժելի ենք ու ինչ անում ենք՝ լավ ենք անում։ Ձեզ էլ մաղթում ենք հանգիստ սպասել 2026 թվին ու հուսալ, որ կկարողանաք մեզ հաղթել արդար ու ցիվիլ պայքարում։ Խելոքներ»։
Նիկոլերենից թարգմանությունը՝ Ռ.Մելիքյանի»։