ԱՄՆ նախագահ Դոնալդ Թրամփը միջուկային համաձայնագրին վերադառնալու վերաբերյալ ԱՄՆ-ի և Իրանի պաշտոնյաների հանդիպումից օրեր առաջ կրկնել է ռազմական գործողություններ սկսելու իր մտադրությունը, եթե Թեհրանը չընդունի միջուկային համաձայնագիր կնքելու իր առաջարկը: Ընդ որում, նա ասել է, որ Իսրայելը կլինի հնարավոր ռազմական գործողությունների «առաջնորդը»։ «Արմենպրես»-ի փոխանցմամբ՝ այս մասին հաղորդում է The Associated Press-ը՝ վկայակոչելով Թրամփի խոսքերը ապրիլի 9-ին լրագրողների հետ հանդիպմանը։
Միևնույն ժամանակ ԱՄՆ նախագահն ասել է, որ ցանկանում է, որ Իրանը «հիանալի լինի»:
«Միակ բանը, որ նրանք չեն կարող ունենալ, միջուկային զանքն է։ Նրանք հասկանում են դա», – ասել է նա։
Թրամփը նաև կրկնել է անհրաժեշտության դեպքում ռազմական ուժ կիրառելու իր խոստումը և ասել, որ Իսրայելը մեծ դեր կունենա հնարավոր հարձակման մեջ:
«Եթե դա պետք է արվի ռազմական ճանապարհով, ապա մենք դա կանենք ռազմական ճանապարհով: Իսրայելն, ակնհայտորեն, մեծապես ներգրավված կլինի դրանում: Նրանք կլինեն դրա առաջնորդները: Բայց մեզ ոչ ոք չի առաջնորդում: Մենք անում ենք այն, ինչ ուզում ենք անել», – ասել է Թրամփը:
Իսրայելի վարչապետ Բենիամին Նեթանյահուն օրերս հայտարարել էր, որ սատարում է Իրանի հետ համաձայնության հասնելու Թրամփի դիվանագիտական ջանքերին՝ հավելելով, որ Իրանը երբեք չպետք է միջուկային զենք մշակի։
Իրանն, ի պատասխան ռազմական ուժ կիրառելու մասին Թրամփի բազմաթիվ սպառնալիքների, ԱՄՆ-ին խոստացել է «կոշտ պատասխան» և Վաշինգտոնին կոչ արել չսրել իրավիճակը։
«Մենք չենք կարող պատկերացնել, որ նախագահ Թրամփն ուզում է դառնալ ԱՄՆ-ի ևս մեկ նախագահ, որը ներքաշվել է Մերձավոր Արևելքում աղետալի պատերազմի մեջ», – գրել է Իրանի արտաքին գործերի նախարար Աբբաս Արաղչին The Washington Post-ի սյունակում:
Իր պաշտոնավարման առաջին ժամկետի ընթացքում՝ 2018 թվականին, Թրամփը միակողմանիորեն դուրս բերեց Միացյալ Նահանգները 2015 թվականի Գործողությունների համատեղ համապարփակ ծրագրից (ԳՀՀԾ) և վերականգնեց Իրանի դեմ պատժամիջոցները։ Թեհրանն, ի պատասխան դրա, աստիճանաբար սկսեց հրաժարվել միջուկային համաձայնագրով ստանձնած պարտավորություններից։
Ապրիլի 12-ին Օմանում նախատեսված են բանակցություններ ԱՄՆ-ի և Իրանի պատվիրակությունների միջև։ Թեհրանը հայտարարել է, որ դրանք լինելու են անուղղակի բանակցություններ, մինչդեռ ԱՄՆ նախագահը հայտարարել է, որ բանակցությունները լինելու են ուղիղ։