«Հայաստանի երեխաների առողջության հիմնադրամ»-ի նախագահ Արմեն Մարտիրոսյանը կիսվել է «հերթական ֆանտաստիկ արդյունքով»։
«Սիրելինե՛րս, ձեր յուրաքանչյուրի մեծ հոգատարության շնորհիվ մենք կարողացանք 2 օրում հավաքել Դավիթի բուժման համար անհրաժեշտ գումարն ու մի բան էլ ավելի՝ 18,557,489 դրամ, խոնարհումս բոլորիդ: Երեխան շուտով կստանա կենսական նշանակության ճառագայթային թերապիան:
2 օրվա ընթացքում երեխայի նյութի տեսանելիությունն անցավ 1 մլն․-ից, տարածեց ավելի քան 10,400, հավանեց ավելի քան 1400 ու մեկնաբանեց մոտ 1000 մարդ: Սա հիանալի արդյունք է, շնորհակալ եմ»,- գրել է Մարտիրոսյանը։
Դավիթը, որը ընդամենը 1 տարեկան է, իր ընտանիքի հետ պայքար է մղում քաղցկեղի դեմ։ Դավիթը ընտանիքի առաջնեկն է. ծնվել է Հայաստանում, ընտանիքի՝ Արցախից տեղահանությունից հետո։
5 ամսականում Դավիթի մոտ ախտորոշվել է նեյրոբլաստոմա տեսակի ծանր քաղցկեղը։
Հայտնաբերումից անմիջապես հետո երեխան ստացել է քիմիաթերապևտիկ բուժում, ապա կատարվել է ուռուցքի ամբողջական հեռացում։ Հետագա բուժման շրջանակներում իրականացվել է բարձր դեղաչափի քիմիաթերապիա և ցողունային բջիջների փոխպատվաստում։ Հետվիրահատական ԿՏ քննությամբ երեխայի մոտ հաստատվել է հիվանդության ռեմիսիա, սակայն հիվանդությունը հաղթահարելու համար, որպես հետագա բուժում, անհրաժեշտ է իրականացնել հիմնական օջախի ճառագայթային բուժում (պրոտոնային թերապիա), որը հասանելի չէ Հայաստանում։