ԱՄՆ նախագահ Դոնալդ Թրամփը կրկին մեղադրել է նախկին նախագահ Ջո Բայդենին և Ուկրաինայի նախագահ Վլադիմիր Զելենսկիին 2022 թվականին Ռուսաստանի կողմից Ուկրաինա ներխուժման և «պատերազմի սկսվելու թույլտվության» համար, միաժամանակ հայտարարելով, որ Ռուսաստանի նախագահ Վլադիմիր Պուտինը նույնպես մեղավոր է, գրում է The Washington Post-ը։
Թրամփը իր հայտարարություններն արել է Սպիտակ տանը Սալվադորի նախագահ Նայիբ Բուկելեի հետ հանդիպման ժամանակ։ «Եթե Բայդենը կոմպետենտ լիներ և եթե Զելենսկին կոմպետենտ լիներ, իսկ ես չգիտեմ՝ արդյո՞ք նա կոմպետենտ է, մենք դժվար հանդիպում ունեցանք այս տղայի հետ, նա պարզապես շարունակում էր ավելի ու ավելի շատ բան խնդրել», – ասել է նա՝ նկատի ունենալով Զելենսկիի հետ փետրվարին կայացած հանդիպումը, որը Օվալաձևսենյակում վերածվեց վեճի։ «Այս պատերազմը երբեք չպետք է թույլ տրվեր, որ տեղի ունենար»,-նշել է Թրամփը։
Նա շարունակել է քննադատել իր նախորդին՝ ներխուժումը որակելով որպես «Բայդենի պատերազմ» և գովաբանելով իր վարչակազմի ջանքերը՝ հրադադարի շուրջ բանակցելու համար՝ հավելելով, որ Պուտինը նույնպես մեղավոր է։ «Բայդենը կարող էր կանգնեցնել այն (պատերազմը – խմբ․) և Զելենսկին կարող էր կանգնեցնել այն, իսկ Պուտինը երբեք չպետք է սկսեր այն։ Բոլորն են մեղավոր», – ասել է ԱՄՆ նախագահը։ Այնուհետև Թրամփը կրկին ուշադրությունը սևեռել է Զելենսկիի վրա՝ ասելով. «Պատերազմ չեն սկսում քեզանից 20 անգամ մեծ մեկի դեմ և հետո հույս ունենում, որ մարդիկ հրթիռներ կտան»։
Պատասխանելով լրագրողների հարցերին՝ ԱՄՆ առաջնորդը նաև հաստատել է, որ Ռուսաստանի համար վերջնաժամկետ է սահմանել կրակը դադարեցնելու համար, բայց կրկին չի նշել ճշգրիտ ամսաթիվը։ Նա նաև վստահեցրել է, որ Միացյալ Նահանգները հաջողության է հասել ռուս-ուկրաինական պատերազմը դադարեցնելու բանակցությունների գործընթացում։
ԱՄՆ նախագահը նշել է, որ շուտով ակնկալում է «լավ առաջարկներ» տեսնել։ «Ես ուզում եմ դադարեցնել սպանությունները։ Եվ կարծում եմ, որ մենք լավ աշխատանք ենք կատարում այդ առումով։ Կարծում եմ՝ շատ շուտով դուք շատ լավ առաջարկներ կունենաք», – հայտարարել է Թրամփը։ Թարգմանությունը՝ Էմմա Չոբանյանի