Մարմարիկից մինչև Հրազդան համագյուղացիները, հարազատները, ոստիկաններն ու փրկարարները փնտրում են երկուամյա Տիգրանին։ Նա անհետացել է երեկ։
Երեխայի հայրը՝ Նորայր Պետրոսյանը Panorama.am-ի հետ զրույցում ասաց, այս պահին դեռ նորություն չունեն։
«Որևէ հետք, որևէ հուշող բան, ոչ մի կետ չկա, որ էդ կետի ուղղությամբ շարժվենք»,-նշեց հայրը։
Երեխայի անհետանալու շրջանառվող վարկածներից մեկն այն է, որ Տիգրանըընկել է տան մոտով հոսող Մարամարիկ գետը։ Միաժամանկ նշվում է, որ հարակից խանութի տեսախցիկները չեն ֆիքսել երեխայի գետն ընկնելը։ Չնայած դրան, ԱԻՆ փրկարարական ջոկատներից բացի աշխատանքներում ներգրավվել են փրկարար շներ և ջրասուզակներ։
Շրջանառվում է նաև երեխային գողանալու վարկածը։ Կա՞ն կասկածելի մարդիկ, որ կարող էին երեխային տանել։
«Չեմ կարող ասել, ի՞նչ իմանամ, ընենց մարդիկ կան էս կյանքում, շատ իմանամ, ինչի են ընդունակ»,-հոգոց քաշեց հայրը։
ՆԳՆ ոստիկանությունից Panorama.am-ին հայտնեցին, որ երեխայի անհետանալու մասին հաղորդում ստացել են երեկ՝ մայիսի 4-ին ժամը 11։52-ին։ Ահազանգողը եղել է փոքրիկի հորեղբայրը։
Նա հայտնել է, որ Մարմարիկ բնակավայրում՝ մասնավորապես 3-րդ փողոցում բնակվող եղբոր երկուամյա երեխան բակից կորել է։
«Բնականաբար ահազանգին արագ արձագանքել են, հաղորդումից անմիջապես հետո մինչ այս պահը համայնքային ոստիկանության Հրազդանի բաժնի ծառայողները, Քրեական ոստիկանության Կոտայի մարզային վարչության ծառայողները, տարածքը սպասարկող հրշեջ փրկարարական ուժերը որոնողական աշխատանքներ են իրականացնում երկուամյա տղային հայտնաբերելու համար»,-ասացին ոստիկանությունից։