Լենինգրադի մարզում «Ռուսական համայնք» շարժման նեոնացիստները ներխուժել են բնակարաններից մեկը, որից հետո հրդեհ է բռնկվել։ Դրա հետևանքով Հայաստանի քաղաքացի է մահացել, վիրավորվել է մեկ աղջիկ, հայտնում է «Дождь» հեռուստաալիքը։ Մայիսի 4-ին ՌԴ Արտակարգ իրավիճակների նախարարությունը հայտնել է Վսևոլոժսկի Լենինգրադյան փողոցում գտնվող բնակարանի հրդեհի մասին։ Ավելի ուշ բնակարանում հայտնաբերվել է 37-ամյա Հայաստանի քաղաքացու դին, իսկ պատուհանների տակ 24-ամյա աղջիկ՝ ծանր վիճակում, գրում է «Ֆոնտանկա» պարբերականը։
Պարբերականի տվյալներով, այդ օրը բնակարան են ներխուժել «Ռուսական համայնք» շարժման նեոնացիստները։ Այս մասին բնակարանի տիրուհուն պատմել է նրա որդին։ Նրա խոսքով՝ բնակարան փորձել են ներխուժել անհայտ անձինք, որոնք ներկայացել են որպես ոստիկաններ։ Նրանք կոտրել են դուռը, «գազ են կիրառել տուժողի նկատմամբ և հարվածել էլեկտրաշոկով», գրում է «Ֆոնտանկան»։
Անհայտ անձինք փորձել են կոտրել այն սենյակի դուռը, որտեղ թաքնված էին բնակչի ծանոթները, որից հետո հրդեհ է բռնկվել։ Բնակարանի տիրուհին ասել է, որ երբ հասել է դեպքի վայր, տեսել է աստիճանահարթակում «մեծ թվով սև հագուստով, «Ռուսական համայնքի» խորհրդանշաններով և դիմակներով տղամարդկանց»։ Ծայրահեղ աջակողմյան շարժման ակտիվիստները «Մոյկա 78» պարբերականին հայտնել են, որ հարևանները լսել են բղավոցներ, իսկ բնակարանի տիրուհին իբր ինքն է դիմել «Ռուսական համայնքին», որպեսզի նեոնացիստները նրան ուղեկցեն։ Նրանք պնդում են, թե «պղպեղով գազ» են կիրառել՝ կնոջը պաշտպանելու նպատակով, իսկ հրդեհը, ըստ նրանց, «Հայաստանի քաղաքացու ձեռքի գործն է»։
Պարբերականը գրում է, որ Քննչական կոմիտեն քրեական գործ է հարուցել՝ «անզգուշությամբ մահ պատճառելու» հոդվածով։