Մոսկվայի քաղաքապետ Սերգեյ Սոբյանինը տելեգրամյան իր ալիքում հայտնել է, որ Ռուսաստանի հակաօդային պաշտպանության ուժերը խոցել են հինգ ուկրաինական անօդաչու թռչող սարք, որոնք ուղղված էին Մոսկվայի վրա։ Միևնույն ժամանակ, «Ռոսավիացիան» հայտարարել է Մոսկվայի հարավում գտնվող օդանավակայանների ժամանակավորապես փակման մասին, հայտնել է BBC-ն:
Սոբյանինը չի հստակեցրել, թե որտեղ են խոցվել անօդաչուները։ Սոբյանինի հայտարարությունից մի քանի րոպե անց Ռուսաստանի քաղաքացիական ավիացիայի վարչությունը հայտարարել է, որ ժամանակավորապես փակվում են Մոսկվայի հարավում գտնվող օդանավակայանները՝ «Վնուկովոն», «Դոմոդեդովոն» և «Ժուկովսկին», ինչպես նաև` «Շերեմետևոն»։ Սերգեյ Սոբյանինը իր տելեգրամյան ալիքում հայտնել է, որ խոցված ուկրաինական անօդաչու սարքերից մեկի բեկորները ընկել են Կաշիրսկոյե մայրուղու վրա, Մոսկվայի հարավում։ Մայրուղին սկսվում է Կրեմլից մոտավորապես ութ կիլոմետր դեպի հարավ և հասնում է դեպի հարավ-արևելք՝ «Դոմոդեդովո» օդանավակայանի ուղղությամբ:
Նրա խոսքով, նախնական տվյալներով «լուրջ վնասներ և տուժածներ չկան»։ Ուկրաինական անօդաչու թռչող սարքերի միաժամանակյա հարձակման մասին տեղեկություններ են ստացվել մի քանի ռուսաստանյան տարածաշրջաններից։ «Ռոսավիացիան» հայտարարել է Կալուգայի, Վոլգոգրադի և Սարատովի օդանավակայանների փակման մասին։ Կալուգան, Մոսկվան, Սարատովն ու Վոլգոգրադը գտնվում են միմյանցից հարյուրավոր կիլոմետրեր հեռավորության վրա։
Այնուհետև РБК-ն հայտնել է, որ մայիսի 6-ի գիշերը ժամանակավոր սահմանափակումներ են մտցվել ռուսաստանյան 13 օդանավակայաններում: Մոսկվայի չորս օդանավակայանների, ինչպես նաև Սամարայի, Սարատովի, Վոլգոգրադի, Կալուգայի, Իվանովոյի, Յարոսլավլի, Նիժնի Նովգորոդի, Կազանի և Նիժնեկամսկի օդանավակայանների աշխատանքը դադարեցվել է։ Ավելի ուշ «Ռոսավիացիան» հայտարարել է, որ Մոսկվայի բոլոր չորս օդանավակայաններում չվերթները վերսկսվել են։
Ուկրաինական կողմը միջադեպը չի մեկնաբանել։ Սակայն ինչպես հայտնի է, ուկրաինացի պաշտոնյաները նախկինում բազմիցս հայտարարել են, որ նման հարձակումները նպատակ ունեն հարվածել ռազմական թիրախներին և ենթակառուցվածքներին, և դրանք հստակ պատասխան են Ռուսաստանի կողմից Ուկրաինայի բնակելի թաղամասերի և էներգետիկ ենթակառուցվածքների վրա շարունակական հարձակումներին։