Իրար աչքերի մեջ շուտ-շուտ նայեք ու կտեսնեք ԼՂ-ի հանձնումը, կտեսնեք ձեր բաժին մեղքը ԼՂ հայ ժողովրդի տեղահանման գործում: Այդ մասին Ազգային ժողովում ՀՀ գլխավոր դատախազի հաղորդման վերաբերյալ քննարկման ժամանակ ասաց «Քաղաքացիական պայմանագիր» խմբակցության քարտուղար Արթուր Հովհաննիսյանը՝ խոսքն ուղղելով խորհրդարանական ընդդիմությանը:
«Դո՞ւք չէիք, որ միտինգներ էիք անում Հանրապետության հրապարակում, ամեն ինչ անում էիք, որ ԼՂ հայ ժողովուրդը լքի իր հայրենի հողը, չպայքարի իր իրավունքների համար, գա Հայաստան, ավելի կոնկրետ՝ Հայաստանի Հանրապետության հրապարակ, ավելի կոնկրետ՝ Կառավարության (շենքի-խմբ.) դիմացի ձեր միտինգներին: Դրանից այն կողմ էլ ո՞նց կարելի է թիրախավորել ԼՂ հայ ժողովրդին: Այդ մարդկանց չթողեցիք՝ իրենց իրավունքների համար պայքարեն, բերեցիք ՀՀ, հիմա էլ նրանց վերադարձի մասի՞ն եք խոսում:
Ինչո՞ւ եք խաբում այդ ժողովրդին ու սուտ պատրանքներ ներարկում: Ախր դուք էլ գիտեք, որ սուտ եք խոսում: Չե՞ք ամաչում ԼՂ հայ ժողովրդից, որ շարունակում եք սին պատրանքներով խաբել ձեր քաղաքական նպատակներն իրականացնելու համար:
Հայ ժողովրդին թիրախավորելով ձեր քաղաքական նպատակներն իրականացնելը ձեր հարյուրամյա քաղաքականության կոդի մեջ է, և դա չի փոխվում: Թիրախ դարձնել հայ ժողովրդին, լուծել սեփական քաղաքական և սեփական հարցերը, դա ձեր քաղաքական կոդն է»,- ասաց նա:
Արթուր Հովհաննիսյանը վստահեցնում է, թե իրենք չեն գնացել վենդետաների ու ունեցվածք խլելու ճանապարհով։
«Մենք ստեղծել ենք մեխանիզմ, որը չի ճանաչում անուն-ազգանուններ, տարեթվեր, պաշտոններ ու ծանոթներ»,- ԱԺ-ում հայտարարեց նա՝ խոսելով ապօրինի ծագում ունեցող գույքի բռնագանձման մասին։
ՔՊ-ականը նշեց, թե իրենք երկիրը չեն տանելու կործանման, որովհետև դա, ըստ նրա, կլինի ինքնաոչնչացման ամենաուղիղ ու ամենակարճ ճանապարհը։
«Մենք չենք դառնալու Ռոբերտ Քոչարյան կամ՝ Սերժ Սարգսյան»,- ասաց նա։
Հովհաննիսյանն ընդդիմությանը կոչ արեց գալ ու վերաբերմունք արտահայտել Ռոբերտ Քոչարյանի ասածների մասին, թե «հայերն են սկսել պատերազմը Ադրբեջանի հետ»։
«Մի հատ եկեք հասկանանք, տեսնենք, թե դուք ով եք»,- հավելեց ՔՊ-ականը։