Հակակոռուպցիոն կոմիտեից հաստատեցին NEWS.am–ի տեղեկությունները, որ իրենց մոտ քննվող վարույթի շրջանակում կաշառք ստանալու և կաշառք տալու մեղադրանքներով ձերբակալվել է 11 անձ։
«Ձերբակալվածներից 3-ը Շենգավիթի թաղապետարանի նախկին ու ներկա աշխատակիցներ են»,–ասացին Կոմիտեից։
Մինչդեռ Երեւանի քաղաքապետի մամուլի խոսնակ Հայկ Կոստանյանը հերքում է տեղի ունեցածը՝ նշելով. «NNEWS.am-ի լրատվական կայքը նյութ է հրապարակել, առ այն որ Շենգավիթ վարչական շրջանի աշխատակազմում կրկին աշխատակիցներ են ձերբակալվել և որ 10-ից ավելի ձերբակալված կա, որոնց մի մասը թաղապետարանի աշխատակիցներ են։
Տեղեկացնում եմ, որ նշված տեղեկատվությունն իրականությանը չի համապատասխանում»։
Ավելի վաղ NEWS.am–ը հայտնել էր, որ Շենգավիթի թաղապետարանի աշխատակիցներ են ձերբակալվել, իսկ ընդհանուր առմամբ ձերբակալվածների թիվը հասնում է մեկ տասնյակի։
Հիշեցնենք, որ Շնեգավիթի թաղապետարանում ապրիլի 19–ին եւս ձերբակալություններ էին եղել, որի առիթով թաղապետ Ռազմիկ Մկրտչյանը գրել էր. «Յուրաքանչյուր քայլ, որն իրականացվում է օրենքի սահմաններից դուրս և համայնքի շահերին հակառակ, ինձ համար անընդունելի է։
Կաշառք վերցնելը, հանրային միջոցներ յուրացնելը՝ այսպես ասված «փող ուտելը», ինձ համար կարմիր գիծ է, որն անցնելը աններելի է և նշանակում է դավաճանել ժողովրդին: Հաշվի առնելով անմեղության կանխավարկածը այս պահին կլռեմ»։