Հայաստանը սկսում է դուրս մնալ ոչ միայն մեծ համաշխարհային քաղաքականության համատեքստից, այլև նույնիսկ տարածաշրջանային քաղաքականությունից։ Այդ մասին svpressa.ru-ին տված հարցազրույցում ասել է արևելագետ Ստանիսլավ Տարասովը։
«Մենք գիտենք, որ ընդդիմությունը պարբերաբար դժգոհություն է հայտնում և կազմակերպում է հանրային բողոքի ցույցեր: Երկրում հասարակությունը, իհարկե, բաժանված է: Մինչ այժմ համամասնությունները Փաշինյանի օգտին են, բայց դրանք շատ աննշան են: Հայաստանը վերածվում է երրորդ կարգի երկրի և սկսում է դուրս մնալ ոչ միայն համաշխարհային մեծ, այլ նաև տարածաշրջանային քաղաքականությունից: Ուշադրություն դարձրեք նրան, թե ինչպիսի լարված, փոթորկալից արտաքին քաղաքական կյանքով է ապրում Վրաստանը, ինչպես է Ադրբեջանը վարում իր քաղաքականությունը: Իլհամ Ալիևն այցելում է Չինաստան, փորձում է միջնորդի դեր ստանձնել Թուրքիայի, Սիրիայի և Իսրայելի հաշտեցման գործում: Իսկ ի՞նչ կարելի է ասել Հայաստանի մասին: Նա խոսում էր այս Զանգեզուրի միջանցքի մասին, և հիմա չի կարողանում «վաճառել» անգամ այդ թեման», – բացատրել է Տարասովը:
Արևելագետն ընդգծել է, որ հայերը հավակնություններ ունեցող ժողովուրդ են և կարողացել են պահպանել իրենց ինքնությունն ու պետականությունն իրենց երկար պատմության ընթացքում։ Երկրի քաղաքացիների մեծամասնությունը, իսկապես, ապրում է տրավմայի շրջան Ղարաբաղի կորստից հետո, և հենց այդ պահին էլ Փաշինյանը խաղադրույք է կատարում ոչ թե իր ապացուցված պատմական դաշնակցի և գործընկերոջ, այլ Արևմուտքի վրա, որը Հայաստանը դիտարկում է միայն որպես տարածաշրջանում իր դիրքերն ամրապնդելու գործիք։ «Հայերը, իհարկե, անհանգստացած են։ Նրանք բավականին քաղաքականապես գրագետ են, լավատեղյակ համաշխարհային քաղաքականության ներկայիս վիճակին, կրթված և զգում են, որ ինչ-որ բան այն չէ և երկիրը սխալ ուղղությամբ է գնում։ Փաշինյանը խաղում է առճակատման վրա։ Գիտեք, նա դարձել է Զելենսկու նման, վերածվել է այնպիսի կերպարի, ինչպիսին, գուցե, Նեթանյահուն է։ Նրա իշխանությունը պահպանելու հիմնական քաղաքական ռեսուրսն առճակատումն է։ Ցանկացած այլ իրավիճակում նա կհեռացվի իշխանությունից», – եզրափակել է Տարասովը։