Գաղտնի փոխանցումներ, հյուրանոցների մահճակալներում թաքցրած փող, շքեղ նվերներ. այն, ինչ բացահայտվել է Բունդեսթագի հանգուցյալ պատգամավոր Կարին Սթրենցի նկատմամբ կաշառակերության գործով, սովորական քաղաքական թրիլերի տեսարաններ է հիշեցնում։
Nordkurier պարբերականի խմբագրությունը ստացել է մեղադրական եզրակացությունը, որում Մյունխենի գլխավոր դատախազությունը շարադրել է Սթրենցի դեմ մեղադրանքները։
Քաղաքական գործիչը, որը մահացել է 2021 թվականին, կենդանության օրոք կասկածվում էր կոռուպցիայի մեջ՝ Ադրբեջանի ավտորիտար ռեժիմի հետ իր կապերի պատճառով։ Նա նախկինում ութ տարի շարունակ եղել է ԵԽԽՎ- ի անդամ ։
Ներկայումս դատարանի առջև են կանգնել Բունդեսթագի երկու նախկին անդամներ և Սթրենցի նախկին զինակիցները։ Էդուարդ Լինտները և Ակսել Ֆիշերը մեղադրվում են Ադրբեջանից կաշառք ստանալու մեջ։
Եթե մեղադրական դատավճիռ կայացվի, դա կդառնա Գերմանիայի պատմության մեջ առաջին դեպքը, երբ խորհրդարանի անդամները մեղավոր կճանաչվեն օտարերկրյա պետական իշխանությունից գումար ստանալու մեջ՝ իրենց հովանավորների շահերից ելնելով իրենց քաղաքական դիրքը չարաշահելու նպատակով։
Սթրենցի անունը կենտրոնական դեր է խաղում այս գործընթացում։ Նախ, որովհետև դրանում ներգրավված է նրա ամուսինը։ Երկրորդ, քննիչներին, ըստ երևույթին, հաջողվել է բացահայտել գերմանա-ադրբեջանական կոռուպցիոն ցանցի մեծ մասը Կարին Սթրենցի շնորհիվ։
Հանգուցյալը, ինչպես պնդվում է, ստացել է 149 900 եվրոյի տպավորիչ գումար, ինչպես նաև տարբեր նվերներ Ադրբեջանից։ Քննիչները նաև բացատրում են, թե երբ, որտեղ և ինչ ուղիներով է նա նվիրատվություններ ստացել Ադրբեջանի օգտին հայտարարությունների և նույնիսկ ձայների համար։
2014 թվականի հոկտեմբերի վերջին/նոյեմբերի սկզբին Սթրենցի, Բունդեսթագի նախկին պատգամավոր, մեղադրյալ Էդուարդ Լինտների և ադրբեջանցի քաղաքական գործչի միջև պայմանավորվածություն է ձեռք բերվել այն մասին, որ Սթրենցը «պետք է միջոցներ ստանա ԵԽԽՎ անդամի կարգավիճակում, Ադրբեջանի համար կարևոր հարցերով իր գործունեության համար»։