ՌԴ Անվտանգության խորհրդի փոխնախագահ Դմիտրի Մեդվեդևը մեկնաբանել է ԱՄՆ նախագահ Դոնալդ Թրամփի խոսքերն այն մասին, թե առանց նրա Ռուսաստանի հետ «իսկապես վատ բաներ» տեղի կունենային:
ԱՄՆ նախագահ Դոնալդ Թրամփն այսօր բավականին կտրուկ էր արտահայտվել Ռուսաստանի հասցեին՝ սոցցանցի իր էջում հայտարարելով, թե Մոսկվան իբր «կրակի հետ է խաղում»:
«Վլադիմիր Պուտինը չի հասկանում այն, որ եթե ես չլինեի, ապա Ռուսաստանի հետ արդեն շատ վատ բաներ տեղի կունենային, և ես նկատի ունեմ՝ շատ վատ բաներ։ Նա կրակի հետ է խաղում»,- հայտարարել Է Թրամփը Truth Social սոցցանցում՝ չհստակեցնելով, թե կոնկրետ ինչ նկատի ունի և ինչ է մեկնաբանում։
Նա նաև հայտարարել է, որ «միանշանակ» դիտարկում է ՌԴ-ի դեմ լրացուցիչ պատժամիջոցներ սահմանելու հնարավորությունը։
«Ինչ վերաբերում Է Թրամփի այն խոսքերին, թե Պուտինը «կրակի հետ է խաղում» և «իսկապես վատ բաներ» են կատարվում Ռուսաստանի հետ, ես գիտեմ միայն մեկ իսկապես վատ բան՝ Երրորդ համաշխարհային պատերազմը: Հուսով եմ՝ Թրամփը դա հասկանում է»,- գրել է նա X-ի իր էջում:
Իր հերթին Պետքարտուղարությունը հայտարարել է, որ ԱՄՆ-ը շարունակում է աջակցել Ռուսաստանի և Ուկրաինայի ուղիղ բանակցություններին:
ՌԴ նախագահի մամուլի քարտուղար Դմիտրի Պեսկովն ավելի վաղ ԱՄՆ նախագահի արտահայտությունները բացատրել էր էմոցիոնալ ծանրաբեռնվածությամբ, որը բնորոշ է բանակցային գործընթացի բոլոր մասնակիցներին: Թրամփը նման հայտարարություններ էր արել Ուկրաինայի ռազմարդյունաբերական համալիրի ձեռնարկությունների վրա ՌԴ ԶՈւ-ի հարվածներից հետո։
Պեսկովն ընդգծել էր, որ ՌԴ-ն կայացնում է այնպիսի որոշումներ, որոնք անհրաժեշտ են պետության անվտանգության ապահովման համար: