ԱՄՆ-ում ՀՀ դեսպան Լիլիթ Մակունցը բազմիցս դիմել է ամերիկյան իշխանություններին՝ կալանավորված Վարդան Ղուկասյանին՝ «Դոգին», (ԱՄՆ–ում նրան կալանավորել են ներգաղթի օրենքները խախտելու համար) Հայաստանին արտահանձնելու խնդրով, գրում է «Հրապարակ» թերթը։
Նշվում է, որ ԱՄՆ իշխանությունները մերժել են Մակունցին, բայց նա նորից է փորձում՝ հույս ունենալով, որ գոնե մի հարցում օգտակար կլինի պետությանը՝ մինչև Հայաստան վերադառնալը։
Թերթը հիշեցնում է, որ Մակունցի ձախողումը սկսվել է նշանակման օրվանից, երբ հայ համայնքի հետ նա չկարողացավ լեզու գտնել։ Եվ առավել խորացել է այն ժամանակ, երբ Բայդեն-Թրամփ մրցապայքարի ժամանակ նա բացառապես Բայդենի թիմի հետ էր շփվում՝ վստահ, որ Քամալա Հարիսն է հաղթելու։
«Հիմա ԱՄՆ-ում ՀՀ դեսպանի «շնորհիվ» մեր հարաբերություններն այնքան են փչացել Թրամփի վարչակազմի հետ, որ ստիպված են կես միլիոն դոլար ծախսել՝ պրոֆեսիոնալ լոբբիստներ վարձել։ Իսկ Մակունցը, չնայած գործուղումը երկարաձգելու ջանքերին, օգոստոսին հետ է կանչվում Հայաստան»,–գրում է թերթը։
«Հրապարակի» տեղեկություններով` ԱՄՆ–ում ՀՀ դեսպանի պաշտոնի վրա աչք ունի ներկայիս սոցապնախարար Նարեկ Մկրտչյանը, սակայն ասում են՝ Փաշինյանը փնտրում է հմուտ դիվանագետ՝ հասկանալով, որ ԱՄՆ վարչակարգի հետ աշխատանքն ամեն դիլետանտի խելքի բանը չէ։
Հիշեցնենք, որ Լիլիթ Մակունցը ԱՄՆ–ում դեսպան է նշանակվել 2021–ի օգոստոսի 2–ին։