Ռուսական հայտնի պատմաբան և հանրային գործիչ Մոդեստ Կոլերովի կարծիքով՝ Ռուսաստանի գլխավոր մարտահրավերներից են այսօր Ուկրաինան և Կենտրոնական Ասիայից եկած թուրքալեզու միգրանտները:
Ըստ նրա, եթե այս տենդենցը շարունակվի, ապա մոտ ժամանակներս Ռուսաստանը կարող է կանգնել լրջագույն վտանգներ առջև:
Եվ, կարծես, Կոլերովի կանխատեսումներին ընդառաջ, Ռուսաստանի Սիբիրի տարածքում վերջին երկու օրվա ընթացքում մեծ սկանդալ է պայթել:
Խանտի-Մանսիյսկի ինքնավար օկրուգի Դումայի պատգամավոր, ազգությամբ ադրբեջանցի՝ Խալիդ Թագիզադեն Սիբիրն անվանել է «հին թյուրքական երկիր»։
Պատգամավորի հայտարարությունը մեծ սկանդալ առաջացրեց Ռուսաստանում: Բողոքներ ներկայացվեցին իրավապահ մարմիններին, և ճնշման տակ պատգամավորն ստիպված եղավ ներողություն խնդրել: Սակայն դա չհանգստացրեց տեղի հասարակությանը:
Մայիսի 30-ին տեղի ռուս պատգամավորները քննարկում էին այն իրողությունը, որ տեղի բնակչության շրջանում կրճատվել է ծնելիությունը, փոխարենը տարածք են եկել Ուզբեկստանի խոպանչիները:
Հենց այդ քննարկումների ժամանակ ադրբեջանցի պատգամավորը առարկել է, թե ուզբեկ խոպանչիները բոլորին էլ «օտարներ չեն», այլ եկել են իրենց «պատմական Հայրենիք»՝ ապրելու:
Ադրբեջանցու այս տեսակետը հայտնվել է համացանցում և իսկական աղմուկ է բարձրացրել ռուսական հանրային շրջանում:
Ռուս պատգամավորները կոչ են արել իրավապահներին՝ քննել ադրբեջանցու խոսքերը, իսկ վերջինս, զգալով, որ ավելորդ արտահայտություններ է արել, սկզբում փորձել է ներողությունով փակել հարցը: Սակայն երբ տեսել է, որ դա չի ստացվում, շտապ լքել է Ռուսաստանը:
Հունիսի երեքին նա արդեն գտնվում էր Ադրբեջանում:
Իսկ Ռուսաստանում, արդեն դաշնային մակարդակով, սկսվել է Թագիզադեի նկատմամբ քննադատության արշավը:
Թագիզադեին մեղադրում են «անջատողականության», «սադրանքի», «Ռուսաստանի ինքնիշխանության նկատմամբ ոտնձգության» և այլ ծանր հանցագործությունների մեջ: Ռուսաստանի գլխավոր դատախազին դիմում է ուղարկվել՝ պահանջելով գործ հարուցել պատգամավորի դեմ:
Պետք է նշել, որ ադրբեջանցու հանդեպ այս արշավը նաև այլ պատճառ կարող է ունենալ, կապված արդեն ավելի բարձր մակարդակում գտնվող խնդիրների հետ:
Ինչպե՞ս կավարտվի այս պատմությունը, այսօր դժվար է ասել:
Պարզ է մեկ բան. ռուս-ադրբեջանական հարաբերություններում սկսվում է մի նոր «էջ», որտեղ այդ հարաբերությունները հայտնվելու են այլ տիրույթում:
Իսկ ինչպե՞ս այն կարող է ազդել մեր տարածաշրջանի վրա, կխոսենք մեր հաջորդ հրապարակումներում:
Արտակ Հակոբյան
Աղբյուրը՝ Zham.am