ԱՄՆ նախագահ Դոնալդ Թրամփը կրկնել է, որ Իրանը չի կարող միջուկային զենք ունենալ, և Վաշինգտոնը դեռ հույս ունի վերադառնալ բանակցությունների սեղանի շուրջ։
Այս մասին ամերիկացի առաջնորդն ասել է Fox News-ին տված հարցազրույցում Իրանի վրա իսրայելական ավիահարվածների մեկնարկից հետո, «X»-ի միկրոբլոգում հայտնել է հեռուստաընկերության թղթակից Ջենիֆեր Գրիֆինը։
«Իրանը չի կարող միջուկային ռումբ ունենալ, և մենք հույս ունենք վերադառնալ բանակցությունների սեղանի շուրջ: Տեսնենք… Իրանի ղեկավարության մեջ կան մի քանի մարդիկ, ովքեր չեն վերադառնա», — մեջբերում է նա Թրամփի խոսքը հեռախոսով ձայնագրված հարցազրույցում:
Գրիֆինի խոսքով՝ Թրամփը նաև ասել է, որ ԱՄՆ-ը նախօրոք իմացել է հարվածների մասին, սակայն չի մասնակցել դրանց։
ԱՄՆ-ի և Իրանի ներկայացուցիչների միջև բանակցությունների հերթական փուլը, որը վեցերորդն է ապրիլից ի վեր, պետք է կայանար այս շաբաթավերջին Օմանում, հաղորդում են ամերիկյան լրատվամիջոցները։
Բանակցային գործընթացում միջնորդ հանդիսացող սուլթանության իշխանությունները հայտարարել են, որ դատապարտում են Իսրայելին՝ Իրանի տարածքին հասցված հարվածների համար։
Օմանը գործողություններն անվանել է վտանգավոր էսկալացիա և ասել, որ դրանք կարող են սպառնալ տարածաշրջանում անվտանգությանն ու կայունությանը:
Իսրայելի ռազմաօդային ուժերը գիշերը հարձակվել են Թեհրանի մոտակայքում գտնվող առնվազն վեց ռազմական բազաների վրա։
Հունիսի 13-ի գիշերը Իսրայելի պաշտպանության բանակը հայտարարել Է Իրանի միջուկային օբյեկտներին հարվածելու մասին և սկսել է ռազմական գործողություն։ Վարչապետ Բենիամին Նեթանյահուի խոսքով՝ գործողությունը կտևի «այնքան օր, որքան անհրաժեշտ լինի»։
ՑԱԽԱԼ-ը պնդում է, որ Իրանը բավականաչափ հարստացված ուրանի պաշար ունի՝ մի քանի ատոմային ռումբ պատրաստելու համար մի քանի օրվա ընթացքում, և անհրաժեշտ է միջոցներ ձեռնարկել այս «անխուսափելի վտանգը» կանխելու համար: Օդային և թիրախային հարվածներ են հասցվել Թեհրանին, Սպահանին, Նաթանզին, Ֆորդոյին, Ղոմին և Թավրիզին:
Իրանի գերագույն և հոգևոր առաջնորդ այաթոլլա Ալի Խամենեին Իսրայելին զգուշացրել է Իրանի տարածքին հարվածներից հետո «դառը և ցավալի» հետևանքների մասին։
Խամենեին հայտարարել է, որ կատարյալ ազատություն է տալիս զինվորականներին:
Իրանական լրատվամիջոցները հայտնում են, որ Թեհրանին Իսրայելի հարձակման հետևանքով կան զոհեր և վիրավորներ խաղաղ բնակչության շրջանում, ավերվել են բազմաթիվ ենթակառուցվածքներ:
Ըստ իրանական լրատվամիջոցների՝ իսրայելական հարվածների հետևանքով զոհվել են «Իսլամական հեղափոխության պահապանների կորպուսի» հրամանատար գեներալ Հոսեյն Սալամին, Իրանի զինված ուժերի գլխավոր շտաբի պետ Մոհամադ Բաղերին, միջուկային գիտնական, «Իսլամական ազատ համալսարանի» նախագահ Մոհամմադ-Մեհդի Թեհրանչին և «Իրանի ատոմային էներգիայի կազմակերպության» նախկին ղեկավար, միջուկային գիտնական Ֆերեյդուն Աբբասին։