ԱԺ Պաշտպանության և անվտանգության հարցերի մշտական հանձնաժողովի նիստի ընթացքում ՊՊԾ աշխատակիցը պահանջեց «Մեդիահաբ» կայքի լրագրող Վահե Մակարյանը դուրս գա հանձնաժողովի նիստերի սենյակից։
Հանձնաժողովի նախագահ Անդրանիկ Քոչարյանն ասաց. «Վահե Մակարյան, դուրս եկեք։ Դուրս եկեք, դրսում պարզեք։
Ծառայության աշխատակիցը ձեզ… երևի բան ունի ասելու։ Ճշտեք, ներս եկեք»։
«Հայաստան» խմբակցության պատգամավոր Գեղամ Մանուկյանն ասաց. «Վահե Մակարյանը՝ որպես լրագրող, ցականում է հանձնաժողովի նիստին մասնակցել։ Աշխատակազմի ղեկավարն ասում է՝ Վահեն իրավունք չունի Ազգային ժողովի տարածք մտնի»։
Այնուհետև Վահեն դուրս եկավ սենյակից։
Նա ասաց ՊՊԾ աշխատակիցներին, որ ԱԺ Կանոնակարգ օրենքում կետ չկա, որն իրեն արգելում է գտնվել հանձնաժողովի նիստերի դահլիճում։
«Այդ մասով ինձ չէ, դիմեք աշխատակազմին»,- ասաց ՊՊԾ աշխատակիցը։
ՊՊԾ աշխատակիցները ոլորեցին Վահեի ձեռքերն ու հանեցին դուրս։
«Ոչ մի տեղ չենք տանում, դուրս է գալիս Ազգային ժողովի տարածքից»,- ասաց ՊՊԾ աշխատակիցը։
«Սա Ալեն Սիմոնյանի մանրախնդրության, փոքրոգության հերթական դրսևորումն է, ուրիշ ոչ մի բան»,- ասաց Վահեն։
ՊՊԾ աշխատակիցն ասաց. «Մեր օրինական պահանջին չէր ենթարկվում։ Ասացի՝ դուրս եկեք, Վահեն ասաց՝ դուրս չեմ գալիս»։
Վահե Մակարյանը օրենքով սահմանված կարգով, պատգամավոր Գեղամ Մանուկյանի հայտով է ներկա գտնվել հանձնաժողովի նիստին։
«Նախապես ճշտել եմ՝ կարող եմ գտնվել այն տարածքում, որտեղ պատգամավորն է գտնվում, եկել եմ լուսաբանելու այդ պատգամավորին ու հանձնաժողովի նիստը։ Ինձ ասում են՝ կարող եմ գտնվել պատգամավորի սենյակում, բայց օրենքի նման կետ չկա։ Չկա օրենքի կետ, որ չեմ կարող այստեղ գտնվել։ Դա Ալենի ու Դավոյի հորինած օրենքն է։ Ոնց ապօրինի զրկել են բեյջից, այդպես ապօրինի հիմա հեռացնում են տարածքից»,- ասաց Վահե Մակարյանը։
Նշենք, որ Վահե Մակարյանը «Ալեն և Դավո» ասելով նկատի ունի Աժ նախագահ Ալեն Սիմոնյանին և ԱԺ աշխատակազմի ղեկավար Դավիթ Առաքելյանին։