«Փաստինֆո»-ի տեղեկություններով՝ գործարար, բարերար Սամվել Կարապետյանը գիշերը բերման ենթարկվելուց հետո տեղափոխվել է ՔԿ։ Այժմ Կարապետյանը գտնվում է ՔԿ-ում, արդեն քրեական վարույթ է նախաձեռնվել։ Թե ինչ քրեական վարույթի մասին է խոսքը՝ դեռևս հայտնի չէ, վարույթն իրականացնող մարմնի՝ ՔԿ-ի հետ կապ հաստատել չհաջողվեց, դատախազությունից էլ զերծ մնացին մեկնաբանություններից՝ առաջարկելով դիմել նախաքննական մարմին։ Չի բացառվում, որ իրավապահները պարզապես փորձում են «գտնել», թե ինչում են մեղադրում Կարապետյանին, թերևս, կառույցների լռությունը նաև այս հանգամանքով է պայմանավորված,հատկապես, որ երեկ ՔԿ-ից «Փաստինֆո»-ի հետ զրույցում ասել էին, որ իրենց մոտ քրեական վարույթ չկա։
Ինչպես արդեն հայտնել ենք՝ Սամվել Կարապետյանը երեկ հանդես է եկել ի պաշտպանություն Հայ Առաքելական Եկեղեցու, ինչից հետո Կարապետյանին թիրախավորել է Նիկոլ Փաշինյանը, ինչին հաջորդել է ՔՊ-ականների ոհմակային հարձակումը, ՀԷՑ-ը ազգայնացնելու սպառնալիքները։ Այս հայտարարություններին զուգահեռ իրավապահներն են շտապել նրա տուն՝ բերման ենթարկելու։
Առաջին փորձը չի հաջողվել, Կարապետյանը փոխոստիկանապետի ուղեկցությամբ միայն կեսգիշերին է տեղափոխվել առանձնատնից։ Ի դեպ, իրավապահների գործողություններին զուգահեռ Նիկոլ Փաշինյանն անգամ չի թաքցրել, որ իր ուղիղ հրահանգով են հետապնդումներ իրականացրել Կարապետյանի նկատմամբ, ուստի, հետաքրքիր է, թե այս քաղաքական ցցուն հետապնդումների համատեքստում ինչպես են գործը քննող քննիչները, դատախազները, հնարավոր կալանք տվող դատավորը պնդելու, թե հետապնդումը բացառապես իրավական բնույթի է։ Հատկանշական է, որ այսօր առավոտյան պաշտոնից ազատվել է ԱԱԾ տնօրեն Արմեն Աբազյանը, որը, ըստ շրջանառվող լուրերի, հրաժարվել է իրականացնել «ասֆալտին փռելու» օպերացիա։
Հեղինակ՝ Իզաբել Սահակյան