Իրանից մարդկանց մեծ ներհոսքի դեպքում սահմանամերձ Սյունիքի մարզի հյուրանոցային ֆոնդը բավարար չէ նրանց ընդունելու համար, Sputnik Արմենիային ասաց տուրիզմի փորձագետ Վլադիմիր Գևորգյանը։
Ավելի վաղ հայտնել էինք, որ Իրան-Իսրայել զինված հակամարտության հետևանքով Հայաստան-Իրան սահմանի անցակետով սկսվել է իրանցիների ու այլ օտարերկրացների հոսքը Հայաստան։
Գևորգյանի հաշվարկով՝ Սյունիքում ընդհանուր առմամբ շուրջ 50 հյուրանոց կա, որոնց մահճակալային ընդհանուր ֆոնդը տատանվում է 1000-1500-ի սահմաններում։
Մարզային հյուրանոցներից մեծ մասը` 30-35-ը, Գորիսի հատվածում են, մնացածը` այլ բնակավայրերում։ Հյուրանոցները հիմնականում մեծ չեն` յուրաքանչյուրը` 10-15 սենյականոց։
«Սյունիքում առավել զարգացած հյուրանոցային ցանց ունի Գորիսի տարածաշրջանը։ Որոշակի քանակով հյուրանոցային համալիրներ կան նաև Կապանում։ Իսկ Մեղրիում ու Քաջարանում հյուրանոցներն ավելի քիչ են»,– նշել է Գևորգյանը։
Վլադիմիր Գևորգյանի կարծիքով` Իրանում իրավիճակով պայմանավորված այս հոսքերն առաջիկայում արտացոլվելու են ՀՀ–ի վիճակագրական տվյալներում` որպես զբոսաշրջության ցուցանիշների աճ, ինչպես եղավ 2022-23թթ-ին Ռուսաստանից ռելոկանտների և Հայաստանի տարածքով տարանցող ՌԴ քաղաքացիների դեպքում։
Մինչդեռ, այսօր զբոսաշրջությունը Հայաստանում նվազման միտումներ է դրսևորում, ինչը, ըստ մասնագետի, պայմանավորված է հենց վերոհիշյալ գործոնի թուլացմամբ։
«Վերջին տարիներին, երբ մենք ունեինք մեծ աճ, և վիճակագրական կոմիտեն ներկայացնում էր 1, ապա 2 մլն զբոսաշրջիկ, դա ավելի շատ պայմանավորված էր նրանով, որ Հայաստանը տարանցիկ երկիր էր դեպի այլ երկրների թռչելու համար, և շատերը, ովքեր չէին եղել Հայաստանում, 1-2 օր այստեղ ժամանակ էին անցկացնում, ապա մեկնում այլ երկիր։ Դասական սահմանման համաձայն՝ զբոսաշրջիկ է համարվում այն այցելուն, ով նվազագույնը 24, առավելագույնը 180 օր է անցկացրել տվյալ երկրում»,– պարզաբանում է Գևորգյանը` հավելելով, որ ՌԴ–ում միջազգային թռիչքների բացմանը զուգահեռ ՀՀ–ում զբոսաշրջության ցուցանիշները էլ ավելի են նվազելու։
Ինչ վերաբերում է կազմակերպված տուրիզմին, ովքեր գալիս են Հայաստան հանգստանալու, մշակութային վայրեր այցելելու, ընդհանուր այցելությունների թվում ընդամենը 5-7 տոկոս են կազմում։
Վլադիմիր Գևորգյանի գնահատմամբ` նվազում է նկատվում նաև եվրոպական երկրներից տուրիզմի հոսքերում, քանի որ Հայաստանն այդ երկրներում արդեն մի քանի տարի ընկալվում է որպես վտանգավոր երկիր։
Ասօր` Իրանում ռազմական գործողությունների ֆոնին այս ընկալումը էլ ավելի է սրվել։
Հիշեցնենք` Իրանա-իսրայելական շարունակվող հակամարտության ֆոնին Հայաստանում ԱՄՆ–ի դեսպանությունը ԱՄՆ քաղաքացիներին կոչ էր արել դրսևորել զգուշություն, խուսափել ցույցերից և մեծ հավաքույթներից, հետևել տեղական իշխանությունների հրահանգներին: Հայտարարության մեջ ասվում էր նաև խուսափել Սյունիքում Իրանի հյուպատոսություն, Երևանում Իրանի դեսպանատուն և Կապույտ մզկիթ այցելելուց:
Նշենք, որ Իրանում Իսրայելի կողմից հրթիռակոծությունների հետևանքով Չինաստանի, Վրաստանի և Ռուսաստանի դեսպանատները առաջարկել էին իրենց քաղաքացիներին տարհանվել Իրանից։ Չորս հնարավոր երթուղիներից մեկը Հայաստանով անցնող ցամաքային ճանապարհն է։