Իրանի ռազմական գործողությունները ավարտվել են գիշերը ժամը 04:00-ին, X-ում գրել է Իրանի ԱԳ նախարար Աբբաս Արաղչին:
Ավելի վաղ նա գրել էր. «Մեր զինված ուժերի ռազմական գործողություններն Իսրայելի ագրեսիան պատժելու համար շարունակվել են մինչև վերջին րոպեն՝ առավոտյան ժամը 4։00-ն:
Այս պահի դրությամբ որևէ «համաձայնություն» չկա հրադադարի կամ ռազմական գործողությունների դադարեցման վերաբերյալ։ Այնուամենայնիվ, եթե Իսրայելը դադարեցնի իր անօրինական ագրեսիան Իրանի ժողովրդի դեմ ոչ ուշ, քան Թեհրանի ժամանակով ժամը 4-ին, մենք մտադրություն չունենք շարունակել մեր պատասխանը դրանից հետո»:
***
Իսրայելը համաձայնել է Թրամփի հրադադարի առաջարկին, հայտնել է Իսրայելի վարչապետ Բենիամին Նեթանյահուի գրասենյակը:
Հայտարարության մեջ նշվում է, որ Թել Ավիվը հասել է իր նպատակներին. Իրանի կողմից միջուկային և հրթիռային սպառնալիքը վերացվել է։
Հիշեցնենք, որ ավելի վաղ Թրամփը գրել էր. «Շնորհավորում ենք բոլորին: Իսրայելի և Իրանի միջև լիակատար պայմանավորվածություն է ձեռք բերվել կրակի ամբողջական դադարեցման վերաբերյալ․12 ժամվա ընթացքում, որից հետո պատերազմը կհամարվի ավարտված»: