Իրանի նախագահ Մասուդ Փեզեշքիանը Ալիևին կոչ է արել ուսումնասիրել և ստուգել Ադրբեջանի տարածքից Իրանի դեմ իսրայելական ԱԹՍ-ների թռիչքների մասին լուրերը։ Այս մասին երկու նախագահները խոսել են հեռախոսազրույցի ընթացքում, գրում է Mehr-ը։
Իլհամ Ալիևը հեռախոսազրույցի ընթացքում հավաստիացրել է, որ իր երկրի տարածքը չի օգտագործվել և չի օգտագործվելու «բարեկամական ու եղբայրական Իրանի դեմ»։
«Ադրբեջանը պահպանում է իր օդային տարածքի լիակատար վերահսկողությունը և երբեք թույլ չի տա, որ այն օգտագործվի Իրանի դեմ»,– ասել է Ալիևը։
Իսրայելը հունիսի 13-ի գիշերը լայնածավալ գործողություն է սկսել Իրանի դեմ ՝ նրան մեղադրելով գաղտնի ռազմամիջուկային ծրագիր իրականացնելու մեջ: Օդային ռմբակոծությունների և դիվերսիոն խմբերի արշավանքների թիրախներն էին ատոմային օբյեկտները, գեներալիտետը, ականավոր միջուկային ֆիզիկոսները, ավիաբազաները: Իրանը հերքել է մեղադրանքները՝ պատասխան հարձակումներ սկսելով։ Կողմերը 12 օրվա ընթացքում հարվածներ են փոխանակել, որոնց միացել է նաև ԱՄՆ-ը՝ հունիսի 22-ի գիշերը ռմբակոծելով Իրանի միջուկային օբյեկտները Նաթանզում, Ֆորդոյում և Սպահանում։
Դրանից հետո Թեհրանը հունիսի 23-ի երեկոյան հրթիռային հարվածներ է հասցրել Կատարում ԱՄՆ-ի Էլ Ուդեյդի ռազմակայանին՝ հայտարարելով, որ իրանական կողմը մտադիր չէ հետագա էսկալացիայի գնալ:
ԱՄՆ նախագահ Դոնալդ Թրամփը դրանից հետո հույս է հայտնել, որ Կատարում ամերիկյան ռազմակայանին հարվածելով Իրանը «լիցքաթափել է», և այժմ հնարավոր է Մերձավոր Արևելքում խաղաղության և համաձայնության հասնել: Նա նաև հայտարարել է, որ Իսրայելն ու Իրանը պայմանավորվել են հրադադար կնքել, որը 24 ժամվա ավարտից հետո պետք է դառնա «12-օրյա պատերազմի պաշտոնական ավարտ»: