ՀՀ վարչապետ Նիկոլ Փաշինյանն իր նեղ շրջապատում հնչեցրել է միանշանակ հրահանգ՝ Սամվել Կարապետյանի և Հայ առաքելական եկեղեցու դեմ պետք է ծավալել տեղեկատվական լայնամասշտաբ հարձակում, գրում է «Ժողովուրդ» օրաթերթը։
«Ըստ մեզ հասած տվյալների՝ այս քարոզչական ռազմավարության նպատակը մեկն է միջազգային հանրությանը համոզել, թե գործ ունենք ահաբեկչությանն առնչվող կառույցների ու անձանց հետ. ուստի, սոլիդարության կամ համերաշխության որևէ դրսևորում պետք է կանխել արմատից։ Փակ դռների ետևում Փաշինյանն ասում է՝ այնքան պետք է կրկնենք, մինչև աշխարհում չմնա մի մարդ, ով կկասկածի, թե Սամվել Կարապետյանը և եկեղեցին ահաբեկիչ չեն։ Քարոզչական շտաբի ներսում նույնիսկ շրջանառվում է ձևակերպումը՝ «բարձրացնել տեղեկատվական աղմուկի աստիճանը մինչև ինֆորմացիոն շոկի»»,– պարբերականին պատմել է աղբյուրը։
Ընդգծվում է, որ դիվանագիտական տարբեր մակարդակներում՝ ՄԱԿ-ից մինչև տարբեր think tank-եր, Փաշինյանի թիմը պնդումներով փորձում է ներկայացնել իրավիճակը որպես «հայկական 9/11»՝ այսպես ճանապարհ հարթելով հստակ թիրախների դեմ սանձազերծված քարոզչական պատերազմի համար։
Նույն աղբյուրները հավելում են, որ անգամ ամենաանմեղ կարծիքները կամ մտահոգության արտահայտումները Փաշինյանի թիմի կողմից ընկալվում են անթույլատրելի:
«Երբ ԱՄՆ կոնգրեսի Հայկական հարցերի հանձնաժողովի փոխնախագահ Բրեդ Շերմանը հայտարարեց, որ «մտահոգված է բարերար Սամվել Կարապետյանի կալանքով», ՔՊ-ական Արսեն Թորոսյանը բոցաշունչ ելույթով հարձակվեց նրա վրա՝ պնդելով, թե «Կարապետյանը ահաբեկիչ է»,–գրում է օրաթերթը։
Ըստ տեղեկությունների` իշխանական աղբյուրներին մոտ գտնվող վերլուծաբանները սա դիտարկում են որպես տեղեկատվական ինկվիզիցիայի նոր փուլ. երբ կասկածը դառնում է մեղադրանք, իսկ հակառակ կարծիքը՝ թշնամանք։
Նշվում է, որ այս ֆոնին ակնհայտ է դառնում, որ թիրախում միայն Սամվել Կարապետյանը չէ. հարվածի տակ է նաև Հայ Առաքելական Եկեղեցին, իսկ Վեհափառի դեմ հարձակման նոր քայլեր են մշակվում։