Մեծ Բրիտանիայում Մարդու իրավունքների արաբական կազմակերպությունը (AOHR UK) հայտարարել է, որ չնայած ԱՄՆ-ի և Իսրայելի կողմից, այսպես կոչված, Գազայի մարդասիրական հիմնադրամի (GHF) միջոցով պարտադրված օգնության բաշխման համակարգին սկզբնական մերժմանը, ինչպես նաև ՄԱԿ-ի և արևմտյան պաշտոնյաների կողմից GHF-ի «վտանգավոր դերի մասին հրապարակային նախազգուշացումներին», կողմերից ոչ մեկը չի կարողացել ճնշում գործադրել «իսրայելական օկուպացիոն ուժերի վրա՝ պաշտպանելու մարդասիրական աշխատանքը և խափանելու օգնության բաշխումը ռազմականացնելու նրա ծրագիրը»։
Factor.am-ի փոխանցմամբ, AOHR UK-ը նշում է, որ GHF-ի ստեղծման հանգամանքներն ու ժամկետները՝ ՄԱԿ-ի շրջանակներից դուրս և Իսրայելի բանակի և անվտանգության գործակալությունների հետ սերտ համագործակցությամբ, հստակ ցույց են տալիս, որ դրա նպատակը օգնության մատակարարումը չէ։ «Այն ավելի շուտ նպատակ ունի խորացնել բնակչության սովն ու նվաստացումը, նպաստել պաղեստինցիների տեղահանմանը, ավելացնել նրանց տառապանքները և նույնիսկ սպանել նրանց, երբ նրանք մոտենում են սննդի բաշխման կետերին։
Մինչ Միավորված Ազգերի Կազմակերպությունը կառավարում է 400 բաշխման կետեր, GHF-ըստեղծել է ընդամենը չորսը՝ բոլորը հարավում, միտումնավոր ստիպելով մարդկանց գաղթել հարավ՝ սնունդ փնտրելու համար»,-ասվում է կազմակերպության հայտարարության մեջ։ AOHR UK-ը նշում է, թե «ավելի քան 600 օր շարունակվող ցեղասպանության և ավելի քան 90 օրվա սահմանների լիակատար փակման ընթացքում իսրայելական օկուպացիան համակարգված կերպով խոչընդոտել է միջազգային օգնության կազմակերպությունների աշխատանքին։ Դա արվել է անցակետերը բազմիցս փակելով, օգնության ավտոշարասյուները թիրախավորելով (ուղղակիորեն կամ կազմակերպված տեղական խմբավորումների կողմից թալանի միջոցով), սննդի բաշխման կենտրոնները, խոհանոցները և հացի խանութները ռմբակոծելով, ինչպես նաև՝ օգնության աշխատակիցներին սպանելով։ Ավելին, UNRWA-ի (ՄԱԿ-ի Մերձավոր Արևելքում Պաղեստինի փախստականների օգնության և աշխատանքների գործակալություն) դեմ զրպարտչական արշավ է իրականացվել՝ այն կեղծ կերպով կապելով ահաբեկչության հետ։
Նշվում է, որ պաշտոնական գրառումները ցույց են տալիս, որ GHF-ը ստեղծվել է 2025 թվականի փետրվարի 12-ին հատուկ նպատակով՝ խաթարել Միավորված Ազգերի Կազմակերպության և նրա գործընկեր կազմակերպությունների դերը և մարդասիրական օգնությունը զենքի վերածել ցեղասպանությանը ծառայեցնելու համար։ Փաստաթղթերը ցույց են տալիս, որ GHF-ը գրանցված է Ժնևում (Շվեյցարիա) և Դելավերում (ԱՄՆ) և ղեկավարվում է չորս անձանց կողմից՝ Դավիթ Փափազյան (հայ, բնակվում է Մեծ Բրիտանիայում, Ժնևի մասնաճյուղի տնօրեն), Դեյվիդ Քոհլեր (Շվեյցարիայի քաղաքացի), Ջոնի Մուր կրտսեր (Դելավերի մասնաճյուղի տնօրեն) և Լոյկ Հենդերսոն (ամերիկացի, բնակվում է Վիրջինիայում)։ GHF-ում, ըստ աղբյուրի տեղեկությունների, աշխատում է ավելի քան 300 զինված անձնակազմ։
Դավիթ Փափազյանը «Հայաստանի պետական հետաքրքրությունների ֆոնդ»-ի՝ ԱՆԻՖ՝ (ANIF) նախկին տնօրենն է, որն ընդգրկված Գազայի հումանիտար հիմնադրամի (GHF) տնօրենների խորհրդի կազմում։
Այս կազմակերպությունը ստեղծվել է ԱՄՆ-ի ու Իսրայելի նախաձեռնությամբ, գործունեությունը ծավալում է մայիսի 27-ից ու նպատակ ունի փոխարինել ՄԱԿ-ի գործակալություններին ու տարածաշրջանի այլ կից կազմակերպություններին։ Ծրագրի համաձայն՝ Գազայի հատվածում օգնություն տրամադրող բոլոր միջազգային կազմակերպությունները, այդ թվում՝ ՄԱԿ-ի հովանու ներքո գործողները, այսուհետ կկարողանան օգնություն տրամադրել միայն այս հիմնադրամի միջոցով: ՄԱԿ-ի կազմակերպությունները դատապարտել են ծրագիրը ու չեն համագործակցում GHF-ի հետ։ Միջազգային լրատվամիջոցներն էլ անհասկանալի ու ոչ թափանցիկ են գնահատում կառույցի ֆինանսավորումն ու դրա մեխանիզմները։
Պաղեստինյան աղբյուրներն էլ նշում են, որ օգնության բաշխման կենտրոնները պաղեստինցիների համար վերածվել են «մահվան թակարդների», որոնք իսրայելական բանակի մշտական թիրախում են: Ի դեպ, ԱՄՆ Պետքարտուղարությունը հունիսին հայտարարել էր, որ 30 մլն դոլար կհատկացնի Գազայի օգնության հիմնադրամին։ Ըստ AOHR UK-ի՝ բաշխման կետերի կենտրոնացումը հարավում նպատակ ունի ստիպել հյուսիսից եկած մարդկանց քայլել հարյուրավոր կիլոմետրեր, ինչը նպաստում է նրանց տեղահանմանը և վատթարացնում նրանց տառապանքները: Խոցելի խմբերը, այդ թվում՝ տարեցները և առողջական խնդիրներ ունեցողները, հաճախ չեն կարողանում հասնել կենտրոններ, ինչի հետևանքով նրանք լիովին զրկված են սննդից, եթե այլընտրանքային տարբերակներ չեն տրամադրվում։ Ըստ կազմակերպության՝ «GHF-ի պաշտոնյաների ներգրավվածությունը պատերազմական հանցագործությունների մեջ անհերքելի է»։ Միջազգային իրավունքի համաձայն՝ «մարդասիրական օգնության բաշխումը պետք է անկախ մնա օկուպացիոն ուժերից , այս ոլորտում գործող ցանկացած կազմակերպություն պետք է զերծ մնա օկուպացիոն ուժերի հետ օգնություն բաշխելու համար համագործակցելուց կամ պայմանագրեր կնքելուց, քանի որ դա ծառայում է նրանց քաղաքական և ռազմական օրակարգին»։
Մեծ Բրիտանիայի մարդու իրավունքների գրասենյակը կոչ է արել Մեծ Բրիտանիայի հակաահաբեկչական հրամանատարությանը (SO15) հետաքննել Մեծ Բրիտանիայում բնակվող և որպես Ժնևի մասնաճյուղի տնօրեն գրանցված Դավիթ Փափազյանին՝ ռազմական հանցագործություններին մեղսակից լինելու և Իսրայելի օկուպացիային ծառայող մարդասիրական գործողությունները զենքի վերածած հաստատություն ղեկավարելու մեղադրանքով։ Այն նաև կոչ է արել Շվեյցարիայի կառավարությանը անհապաղ փակել GHF-ը և հետաքննել նրա քաղաքացի Դեյվիդ Քոլերին, հաշվի առնելով, որ GHF-ը գործում է որպես իսրայելական բանակի շարունակություն՝ իրականացնելով իր ռազմական նպատակները մարդասիրական օգնության պատրվակով, միաժամանակ խաթարելով միջազգային գործակալությունների գործունեությունը և նպաստելով օգնության կենտրոններին մոտեցող պաղեստինցիների կոտորածներին։
Հայաստանի կառավարությանը կոչ է արվել պատասխանատվություն կրել իր քաղաքացի Դավիթ Բաբազյանի համար և ազատել նրան FlyArna-ի՝ Հայաստանի ազգային ավիաընկերության նախագահի պաշտոնից։
Մանրամասները՝ սկզբնաղբյուր կայքում։