ՌԴ Յարոսլավլի և Սվերդլովսկի մարզերում ձերբակալվել են ուկրաինական զանգերի կենտրոնների գործունեությանն առնչություն ունեցող վեց անձինք, որոնք գումար են հավաքել Ուկրաինայի զինուժի համար։ Տեղեկությունը հայտնում է ՌԻԱ Նովոստին՝ հղում անելով ՌԴ անվտանգության դաշնային ծառայության հասարակայնության հետ կապերի կենտրոնին։
«ՌԴ ԱԴԾ-ն, համագործակցելով Ռուսաստանի ներքին գործերի նախարարության հետ, Յարոսլավլի և Սվերդլովսկի մարզերում կանխել է միջտարածաշրջանային կազմակերպված հանցավոր խմբի վեց անդամների անօրինական գործունեությունը։ Նրանք շահագործել են տեղեկատվական ենթակառուցվածքներ` հատուկ նախատեսված ուկրաինական զանգերի կենտրոններից Ռուսաստան GSM–շլյուզների կամ այսպես կոչված ՍԻՄ-տուփերի միջոցով խարդախ հեռախոսազանգեր իրականացնելու համար», – ասվում է հաղորդագրության մեջ։
Նշվում է, որ այս զանգերի կենտրոնները վերահսկվում են ուկրաինական հատուկ ծառայությունների կողմից, իսկ գողացված միջոցներն ուղղվում են Ուկրաինայի զինված ուժերի կարիքներին։ Քրեական գործ է հարուցվել ՌԴ ՔՕ 159-րդ հոդվածի 4-րդ մասով (խարդախություն):
Պարզվել է` սխեմային մասնակցություն են ունեցել ՍԻՄ-տուփերի ադմինիստրատորները, վաճառողներ և առաքիչներ, ինչպես նաև արտասահմանյան հաշիվներին գումար փոխանցելու հարցում օգնած ռուսաստանցիներ։ Նրանց սպառնում է մինչև 20 տարվա ազատազրկում, իսկ հանցակիցները կարող են պատասխանատվության ենթարկվել պետական դավաճանության համար։