Հայաստանի Հանրապետությունը աշխարհի միակ երկիրը չէ, որ առեսվում է մարտահրավերի, աշխարհի բազմաթիվ երկրներ, եթե չասենք՝ բոլորը առերեսվում են բազմաթիվ մարտահրավերների։ Այս մասին այսօր հրավիրված ասուլիսում հայտարարել է ՀՀ վարչապետ Նիկոլ Փաշինյանն, ընդգծելով, որ մեր պետությունը իր գոյության ողջ ընթացքում առերեսվել է գիտակցված և չգիտակցված մարտահրավերների, իսկ այսօրվա առանձնահատկությունն այն է, որ մարտահրավերներին զուգահեռ, այդ թվում՝ զոհերի և զոհողությունների գնով՝ ՀՀ-ն իր համար ստեղծել է աննախադեպ հնարավորություններ և կարևորագույն հնարավորությունը՝ Հայաստանի Հանրապետության, պետության տեսական թեզը գործնական իրականություն դարձնել։
«Կառավարության առաջնահերթ խնդիրն է կառավարել մարտահրավերները և բացահայտել այն բացառիկ հնարավորությունը, որ այսօր ձևավորվել է։ Այդ նպատակին է ծառայում «Իրական Հայաստանի» գաղափարախոսությունը, որը հիմա արդեն, կարող եմ վստահորեն ասել, որ լայնորեն ընդունվում է ՀՀ ժողովրդի շրջանում։ Ավելին, դա ժողովրդի գիտակցության մեջ ծնված գաղափարախոսություն է, որը պարզապես ժողովրդի ներկայացուցիչները ձևակերպել ու թղթին են հանձնել; Այդ գաղափարախոսությունը արդեն բերում է կոնկրետ արդյունքներ և դրանից առանցքայինը ՀՀ անկախության և ինքնիշխանության շարունակական զարգացումն է, արտաքին և ներքին կայունությունը, ժողովրդավարությունը, օրենքի գերակայությունը, տնտեսության զարգացումը, կոռուպցիայի, ահաբեկչության, հիբրիդային մարտահրավերների դեմ արդյունավետ պայքարը»։
Նա նաև ընդգծել է, որ պետության հարատևության օրակարգին է ծառայում բալանսավորված և բալանսավորման արտաքին քաղաքականությունը, որի արդյունքում ՀՀ միջազգային հեղինակությունը անշեղորեն աճում է։
«Հայաստանը սպասված գործընկեր է թե հյուսիսում, թե հարավում, թե արևելքում, թե արևմուտքում»,-հայտարարել է Փաշինյանը։