Ֆրանսիայի նախագահ Էմանուել Մակրոնը հայտարարել է, որ Փարիզը կճանաչի Պաղեստին պետությունը։ Այս մասին նա պատրաստվում է պաշտոնապես հայտարարել սեպտեմբերին՝ Նյու Յորքում կայանալիք ՄԱԿ-ի Գլխավոր վեհաժողովում, գրում է BBC-ի ռուսական ծառայությունը։ «Հավատարիմ Մերձավոր Արևելքում արդար և երկարատև խաղաղության հանդեպ իմ պատմական հանձնառությանը՝ ես որոշում եմ կայացրել, որ Ֆրանսիան կճանաչի Պաղեստին պետությունը։ Ես հանդիսավոր կերպով կհայտարարեմ այդ մասին ՄԱԿ-ի Գլխավոր վեհաժողովում այս տարվա սեպտեմբերին»,- գրել է Մակրոնը X սոցիալական ցանցում՝ կցելով Պաղեստինի ինքնավարության նախագահ Մահմուդ Աբբասին ուղղված նամակը։
Մակրոնը հավելել է, որ անհրաժեշտ է անհապաղ հրադադար հաստատել, ազատ արձակել բոլոր պատանդներին և զանգվածային մարդասիրական օգնություն ցուցաբերել Գազայի ժողովրդին։ Բացի այդ, անհրաժեշտ է նաև երաշխավորել ՀԱՄԱՍ-ի ապառազմականացումը, ապահովել անվտանգությունը և վերականգնել Գազան։ Պաղեստինցի պաշտոնյաները ողջունել են Մակրոնի որոշումը, մինչդեռ Իսրայելի վարչապետ Բենիամին Նեթանյահուն հայտարարել է, թե այս քայլը կլինի «ահաբեկչության համար պարգև»՝ 2023 թվականի հոկտեմբերի 7-ին ՀԱՄԱՍ-ի հարձակումից հետո։ «Այս պայմաններում Պաղեստինյան պետությունը կդառնա Իսրայելի ոչնչացման, այլ ոչ թե նրա հետ խաղաղ համակեցության հարթակ։
Պաղեստինցիները չեն ձգտում Իսրայելի կողքին պետություն ստեղծել, նրանք ձգտում են պետություն ստեղծել Իսրայելի փոխարեն»,- ասվում է Նեթանյահուի հայտարարության մեջ։ Իսրայելի արտաքին գործերի նախարար Գիդեոն Սաարն էլ Մակրոնի որոշումն աբսուրդ է անվանել։ Ներկայում Պաղեստին պետությունը ճանաչվել է ՄԱԿ-ի անդամ 193 պետություններից ավելի քան 140-ի կողմից։ Նրանց թվում են Ռուսաստանը և Չինաստանը, ինչպես նաև ԵՄ մի քանի երկրներ, այդ թվում՝ Իսպանիան և Լեհաստանը։ ԱՄՆ-ը և Մեծ Բրիտանիան չեն ճանաչել Պաղեստին պետությունը։
Մեծ Բրիտանիայի վարչապետ Քիր Սթարմերը հայտարարել է, որ ուրբաթ արտակարգ բանակցություններ կանցկացնի Ֆրանսիայի և Գերմանիայի ղեկավարների հետ՝ քննարկելու, թե ինչպես «կանգնեցնել սպանությունները Գազայում և բնակչությանն ապահովել սննդով, որի կարիքը մարդիկ այդքան հուսահատորեն ունեն»։ «Մենք ականատես ենք լինում մարդասիրական աղետի»,- ասել է Սթարմերը։
Նա հավելել է, որ պետականությունը «պաղեստինցի ժողովրդի անքակտելի իրավունքն է», և Գազայում հրադադարը «մեզ կդնի Պաղեստինի պետությունը ճանաչելու ճանապարհին»։ ԱՄՆ պետքարտուղար Մարկո Ռուբիոն, իր հերթին, հայտարարել է, որ Վաշինգտոնը կտրականապես մերժում է Մակրոնի՝ Պաղեստին պետությունը ճանաչելու ծրագիրը։ «Այս անխոհեմ որոշումը միայն ծառայում է ՀԱՄԱՍ-ի քարոզչությանը և խաթարում խաղաղության գործընթացը։ Սա ապտակ է հոկտեմբերի 7-ի զոհերի դեմքին»,- գրել է Ռուբիոն X սոցիալական ցանցում։