ՀԷՑ-ի ազգայնացումը շատ արագ առաջ է ընթանում։ Հուլիսի 24-ին աշխատանքից ազատվեցին բազմաթիվ պաշտոնյաներ։ Կադրային նշանակումների որևէ հիմնավորում չներկայացվեց։ Ենթադրելի է, որ ազատվել են այն պաշտոնյաները, որոնք հրաժարվել են աշխատել Ռոմանոս Պետրոսյանի հետ։ Հաջորդ քայլով կանխատեսվում էր գույքագրում՝ պարզելու ընկերության իրավիճակը։
Եթե կարևոր պաշտոններին իրենց մարդկանց նշանակելու համար մի քանի օրն էլ բավարար էր, ապա մեծ ընկերության գույքագրումը տևական ժամանակ էր պահանջելու։ Սակայն այդ էլ կատարվեց շատ արագ։ Հուլիսի 25-ին ՀԷՑ-ը հայտարարություն տարածեց իրավիճակի մասին։
«Հարգելի՛ քաղաքացիներ, սույնով ցանկանում ենք Ձեր ուշադրությունը հրավիրել այն փաստին, որ «Հայաստանի էլեկտրական ցանցեր» ՓԲԸ-ի էլեկտրատնտեսությունն այս պահին գտնվում է տեխնիկապես բավականին վատթար վիճակում և ֆիզիկական մաշվածության մեջ, իսկ որոշ դեպքերում անգամ՝ հետագա շահագործման համար հիմնականում ոչ պիտանի վիճակում»,- գրված էր հայտարարությունում։
Հայտարարության անորոշությունը, կոնկրետ տվյալների բացակայությունը, ընդհանուր գնահատականները վկայում են, որ հանգամանալից հետազոտություն, գույքագրում ու մոնիթորինգ չի իրականացնել։ Այսքան կարճ ժամանակահատվածում հնարավոր էլ չէր պարզել ճշգրիտ պատկերն այս մեծ ընկերությունում։ Այդ դեպքում ի՞նչ իմաստ ուներ այսպիսի անորոշ հայտարարության տարածումը։
Ենթադրելի է, որ այն կապված է Ստոկհոլմի արբիտրաժի որոշման հետ։ Այսպիսով՝ ՔՊ-ական իշխանությունը փորձում է արդարանալ, թե իզուր չէ նախաձեռնել ազգայնացման գործընթացը, վատթար վիճակ է։ Սակայն ոչինչ չեն ասում այն մասին, թե Ռոմանոս Պետրոսյանը ի՞նչ է անելու վատթար վիճակը շտկելու ուղղությամբ։ Փոխարենը հիմնավորում են, որ հաճախակի անջատումները ոչ թե կամայական են, ինչպես կասկածում էին ոմանք, այլ վթարային անջատումներ են, որոնց վերացմանն ուղղված անհետաձգելի գործողությունները ժամանակատար են: Կարծես՝ բոլորին հասկանալի է այս բացատրությունը, սակայն Ռոմանոս Պետրոսյանն այսքանով չի բավարարվում ու շարունակում է անջատումների թեման, հասնելով ուշագրավին։
«Այս պայմաններում, եթե առաջացած վթարները և էլեկտրամատակարարման խաթարումները պայմանավորված չեն մարդածին սխալներով (սարքավորումների և մալուխների վնասում, հենասյուների և ենթակայանների հրկիզում և այլն), ապա «ՀԷՑ» ՓԲԸ-ի օպերատիվ տեխնիկական անձնակազմերը 24-ժամյա աշխատանքային ռեժիմով իրականացվող հերթապահության շնորհիվ հնարավորինս արագ արձագանքում են դրանց և սեղմ ժամկետում ձեռնամուխ լինում էլեկտրամատակարարման վերականգմանը։ Մնացած բոլոր դեպքերում իրականցվող անհետաձգելի վերականգնողական աշխատանքները կարող են օբյեկտիվորեն ավելի երկար ժամանակ պահանջել, ինչի համար հայցում ենք Ձեր բոլորի ըմբռնումը և ներողամտությունը»,- ասված է հայտարարությունում:
Այսպիսով՝ Ռոմանոս Պետրոսյանը պարզել է ամենակարևորը՝ հնարավոր չէ, որ անջատումներ չլինեն։ Եվ ավելին՝ առաջին անգամ հրապարակավ շրջանառվում է կասկած, թե հնարավոր են մարդածին վթարներ։ Այսինքն՝ ենթադրվում է, որ ինչ-որ մարդիկ թյուրիմացաբար կամ միտումնավոր կարող են վնասել սարքավորումները, մալուխները, հենասյուններն ու հրկիզել ենթակայանները։ Ու եթե այդպիսի բաներ լինեն, ապա անջատումները տևական կլինեն։
Հոռետեսները կարծում են, թե այսպիսով հայտարարվում է վհուկների որս։ Առաջիկա օրերին կանխատեսվում են այդպիսի մարդածին վթարներ։ Եվ Ռոմանոս Պետրոսյանի հետաքնությունը շատ արագ կարող է պարզել, թե ովքեր են մարդածին վթարների հեղինակները։ Այս քողարկված սպառնալիքն ուղղված է Սամվել Կարապետյանի հետ ասոցիացվող մարդկանց, որոնք առաջնորդվելով «շառից հեռու» կարգախոսով, հավանաբար, կամավոր կազատվեն աշխատանքից։ Իսկ եթե փորձառու մասնագետներն էլ լքեն ՀԷՑ-ը «շառից հեռու» կարգախոսով, ապա նույնիսկ հասարակ վթարները վերացնելու համար երկար ժամանակ կպահանջվի։
Կարճ ասած՝ ՀԷՑ-ի այս հայտարարությունը ցույց տվեց, որ հնարավոր չէ այնպես անել, որ հոսանքի անջատումներ չլինեն։ Հակառակը՝ ՀԷՑ-ի՝ քաղաքացիներին ուղղված առաջին բովանդակային հայտարարությունն անջատումների բնույթի և տևողության մասին էր։ Եվ ավելին՝ թափանցիկ ակնարկ կար, որ դրանք տևական ու հաճախակի կդառնան, քան մինչ օրս էին։ Սակայն այս անգամ դրանց մեղավորը կլինեն Ռոմանոս Պետրոսյանը ու նրա նշանակած մարդիկ։
ORAGIR.NEWS