«Վեոլիա Ջուր» ընկերությունը պարզաբանումներ է ներկայացրել՝ կապված Երևանի որոշ թաղամասերում վերջին շրջանում հաճախակի ջրանջատումների և ջրասակավության խնդիրների, հանրապետությունում գրանցված աննախադեպ բարձր ջերմաստիճանով և ջրասպառման ծավալների էական աճով պայմանավորված՝ մայրաքաղաքի որոշ հատվածներում ջրամատակարարման գրաֆիկի խախտումների վերաբերյալ:
«Արմենպրես»-ի թղթակցի հարցմանն ի պատասխան «Վեոլիա Ջուր» ՓԲ ընկերությունից նշեցին, որ խնդրի առումով առավել խոցելի են հատկապես Երևանի Նոր Նորք վարչական շրջանի 3-րդ, 4-րդ, 6-րդ, 7-րդ, 9-րդ զանգվածները և Քանաքեռ-Զեյթուն վարչական շրջանի որոշակի հատվածներ:
Ըստ ընկերության՝ վարձակալության պայմանագրով նախատեսված «Պարտադիր կապիտալ աշխատանքների ծրագրի» շրջանակներում 2024 թվականին արդեն իսկ ավարտվել են Նորք Մարաշ թաղամասի հյուսիսային հատվածի ջրամատակարարման ցանցի վերակառուցման և գոտիավորման աշխատանքները:
Ներկայում ընթանում են նոր կառուցված բաշխիչ ցանցի ջրագծերի ու դրանց վրա տեղադրված տարբեր սարքավորումների կարգաբերման, ինչպես նաև հին բաշխիչ ջրագծերի անջատման աշխատանքները, որի ավարտից հետո կխնայվի մոտ 30լ/վրկ ջրաքանակ, ինչը կուղղվի խնդրահարույց հատվածների ջրամատակարարման բարելավմանը:
Նույն ծրագրով նախատեսվում է իրականացնել նաև Ջրվեժ համայնքի խնդրահարույց ջրամատակարարման ցանցի վերակառուցման և գոտիավորման աշխատանքները, որի արդյունքում կխնայվի ևս 30 լ/վրկ ջրաքանակ:
«Խնդիրն այն է, որ այս օրերին կտրուկ ավելացել են ջրի սպառման ծավալները, խմելու ջուրը ոռոգման նպատակով օգտագործելու դեպքերը, ինչը համընկել է ջրաղբյուրների ջրատվության նվազման հետ:
Նշենք, որ վերը նշված վարչական շրջանները սնվում են բացառապես «Կաթնաղբյուր» ջրատարներից և, տեղանքի առանձնահատկություններից ելնելով, տեխնիկապես անհնար է ջուր մղել այս տարածքներ այլ աղբյուրներից, ինչը կատարվում է քաղաքի մյուս վարչական տարածքներում:
Ելնելով վերոգրյալից՝ «Վեոլիա Ջուր» ՓԲԸ-ն աշխատում է շուրջօրյա, մոբիլիզացվել են բոլոր ռեսուրսները, ամենօրյա աշխատանք է տարվում խմելու ջրի պաշարներն առավել խնայողաբար օգտագործելու և հնարավորինս արդյունավետ կառավարում իրականացնելու, ջրի օգտագործման նկատմամբ խիստ հսկողություն սահմանելու և անհարկի կորուստներից զերծ մնալու ու այդ ջրաքանակը ևս համակարգ ներգրավելու համար»,-ներկայացրեցին ընկերությունից՝ նշելով, որ չնայած սուղ միջոցներին և պայմանագրով սահմանափակ ներդրումներին՝ վարձակալության պայմանագրի իրականացման տարիների (2017-2024թթ.) ընթացքում իրացրած ռազմավարության և ներդրումային ծրագրերի հաշվին «Վեոլիա Ջուր»-ը կարողացել է ապահովել բացառապես ջրի ֆիզիկական կորստի 97.4 մլն խորանարդ մետր կամ 15.8% կրճատում (2017թ.-ին արձանագրված ջրարտադրության 618.5 մլն խմ բազիսային մեծությունը 2024թ.-ին նվազեցվել է մինչև 521.1 մլն խմ):
Միաժամանակ, առևտրային կորուստը նվազել է 53.3 մլն խմ-ով կամ 45.6%-ով (2017թ.-ին արձանագրված իրացված /վաճառված/ ջրի 116.9 մլն խմ բազիսային մեծությունը 2024թ.-ին հասցվել է 170.2 մլն խմ-ի):
Ընկերությունը փաստում է, որ ընդհանուր առմամբ՝ 2017-2024 թվականների ընթացքում վերականգնել է 150.7 մլն խմ տեխնիկական և առևտրային կորուստ:
Չհասութագրված ջրաքանակը (արտադրված և վաճառված ջրաքանակների տարբերությունը) 2017թ.-ի (501.6 մլն խմ) համեմատությամբ (2024թ.-ին կազմել է 350.9 մլն.խմ) նվազել է 30 %-ով:
«Այնուամենայնիվ, այս նվաճումները չեն կարող զսպել անկանխատեսելի կլիմայական փոփոխությունները, որոնք հանգեցնում են տարեցտարի նկատվող ջրաղբյուրների ջրատվության նվազեցումներին և բավարարել ակտիվ կառուցապատման հետևանքով առաջացող նոր ջրասպառումներ:
Նշենք նաև, որ հաճախ ջրամատակարարման ընդհատումների պատճառ են հանդիսանում նաև ներդրումային ծրագրերով իրականացվող աշխատանքների վերջնարդյունքում նոր կառուցված համակարգը գործող ջրագծերին միացմամբ, ինչպես նաև ջրամատակարարման ցանցի վերակառուցման կամ վթարավերականգնողական աշխատանքներով պայմանավորված անխուսափելի ջրանջատումները և դրանց հետ կապված ջրամատակարարման ռեժիմների խաթարումները, որի վերականգնումը ևս որոշակի ժամանակ է պահանջում, ինչը բերում է բաժանորդների արդարացի դժգոհությունների»,-մանրամասնեցին ընկերությունից։
Անդրադառնալով ապօրինի ջրօգտագործման դեպքերի մասին հարցին`«Վեոլիա Ջուր»-ը հավաստիացնում է, որ այս արատավոր երևույթի դեմ ընկերությունը պայքարում է ամբողջ տարվա ընթացքում:
«Հատկապես ամռանը, երբ ավելանում է ջրասպառումը, շատ վայրերում խաթարվում է ջրամատակարարման գրաֆիկը, անարդար է, երբ սպառողների համար նախատեսված խմելու ջուրն օգտագործվում է ոռոգման նպատակով: Այս համակարգը ի զորու չէ բավարարել և՛ խմելու ջրի, և՛ ոռոգման կարիքները: Ընկերությունը տարվա ընթացքում հայտնաբերում է հազարավոր ապօրինի շրջանցող ջրագծեր, միացումներ, ջրաչափի միջամտության և այլ դեպքեր։ Օրենսդրությամբ սահմանված իր պարտավորություններն ամեն անգամ «Վեոլիա Ջուր» ՓԲԸ-ն իրականացնում է, կազմում է արձանագրություններ, ապամոնտաժում ապօրինությունները: Սակայն մարդկանց իրավագիտակցությունը փոխել դեռևս չի հաջողվում: Մարդիկ շարունակում են ապօրինի միացումներ կատարել, խմելու ջուրը օգտագործել ոռոգման նպատակով՝ առանց գիտակցելու, որ դրանից տուժում են հազարավոր սպառողներ, որոնք ուղղակի դադարում են ջուր ունենալ, խաթարվում է ընկերության ամբողջ համակարգի աշխատանքը և վարկաբեկվում է նրա բարի համբավը»,-ընդգծեցին «Վեոլիա Ջուր» ընկերությունից։
Անդրադառնալով մասնավորապես Նոր Նորք վարչական շրջանի մի խումբ բնակիչների այն մտահոգություններին, որ «Ջրաշխարհ»-ի լողավազանները լցնելու համար, հավանաբար, օգտագործվում է տարածքին մատակարարվող խմելու ջուրը, ընկերությունից տեղեկացրեցին, որ նշված կազմակերպությունն իր լողավազանների համար օգտագործում է բացառապես խորքային հորերի ջուր, որը կապ չունի «Վեոլիա Ջուր» ընկերության համակարգի հետ։ Ընկերության հավաստմամբ՝ «Ջրաշխարհ»-ն իրենց կողմից ջուր ստանում է միայն խմելու ու կենցաղային կարիքների համար:
Անդրադառնալով ջրասակավության խնդրին և առաջիկայում ջրի ծավալների ավելացման հնարավորությանը՝ «Վեոլիա Ջուր» ընկերությունից նշեցին, որ տարեցտարի ջրաղբյուրների ջրատվության նվազման տեմպերն ավելանում են, ինչը կարող է հանգեցնել համակարգի ջրամատակարարման խաթարումների:
«Բացահայտվել է, որ 2013թ.-ից մինչև 2023թ.-ը ջրաղբյուրների ջրատվությունը նվազել է շուրջ 24%-ով:
Բացի այդ, աննախադեպ տեմպերով իրականացվող կառուցապատումների արդյունքում սպառողների թվի կտրուկ աճը հանգեցնում է լրացուցիչ ջրապահանջարկի, ինչի արդյունքում առաջանում է ջրի դեֆիցիտ և ենթակառուցվածքների ավելացման ու հզորացման պահանջ:
Մեր հաշվարկներով՝ 2017-2024 թվականների ընթացքում միայն տնտեսավարող սուբյեկտներին տրվել է ավելի քան 2000լ/վ ջրաքանակի տեխնիկական պայման, որը կազմում է դեպի Երևան մատակարարվող ջրի շուրջ 20%-ը: Գնահատելով քաղաքի զարգացման ներկայիս տենդենցը՝ ընկերությունը ՀՀ կառավարությանն ու պատկան մարմիններին ներկայացրել է իր մտահոգությունները և ներկայումս այդ ուղղությամբ ընթանում են ուսումնասիրություններ և քննարկումներ։
Փաստորեն, Երևան քաղաքի ջրամատակարարումը կարող է հայտնվել ռիսկային վիճակում: Կառուցապատումներն աննախադեպ տեմպերով աճում են և այժմ դրանք վերաբերում են նաև մարզերի Երևանամերձ բնակավայրերին, որոնց տարածքներով են անցնում Երևանը սպասարկող մայր ջրատարները: Ուստի, կառուցապատողներն անհրաժեշտ ջրաքանակներն ակնկալում են ստանալ Երևան քաղաքը սնող ջրատարներից, քանի որ այլ աղբյուր չկա:
Տասնյակ տարիներ անհրաժեշտ չափով ներդրումներ չեն կատարվել համակարգի հուսալիության ապահովման, օրեցօր զարգացող բնակավայրերի (հատկապես Երևան քաղաքի) ավելացող կարիքների բավարարման համար առկա համակարգերի հզորացման և/կամ նորերի կառուցման, նոր ջրաղբյուրների ներգրավման համար»,-ներկայացրեցին ընկերությունից՝ ավելացնելով, որ ՀՀ վարչապետի, ՀՀ կառավարության և մյուս պատկան մարմինների հետ արդեն երկու տարի շարունակվող ակտիվ քննարկումների արդյունքում՝ 2025թ.-ի հուլիսի 16-ին վարձակալության պայմանագրի կողմերի միջև ստորագրվել է «Վարձակալության պայմանագրում փոփոխություններ և լրացումներ կատարելու վերաբերյալ» համապատասխան համաձայնագիրը:
«Վեոլիա Ջուր» ընկերությունում համոզված են, որ համաձայնագրով՝ վարձատուի և վարձակալի կողմից 2025-2026 թթ. մոտ 11 մլրդ դրամի ներդրումային ծրագրերի իրականացման արդյունքում առաջիկա տարիներին էապես կբարելավվի սպասարկվող բնակչությանը մատուցվող ջրամատակարարման և ջրահեռացման ծառայությունների որակը:
«Ուստի, հաշվի առնելով վերոգրյալը, «Վեոլիա Ջուր» ՓԲԸ-ն դիմել և ակնկալում է ՀՀ կառավարության ու բոլոր շահագրգիռ պատկան մարմինների գործուն աջակցությունը՝ խնդրի լուծմանն ուղղված գործուն միջոցառումների իրականացման հարցում»,-ընդգծեցին ընկերությունից։
Published by Armenpress, original at https://armenpress.am/hy/article/1227521