ՀՅԴ ՀԳՄ ներկայացուցիչ, ԱԺ «Հայաստան» խմբակցության պատգամավոր Իշխան Սաղաթելյանը վարչապետ Նիկոլ Փաշինյանի վերջին ուղերձը վաշինգտոնյան գործընթացի տապալման մասին խոստովանություն է որակել։ Նա նկատել է, որ Ադրբեջանի հետ «հարատև խաղաղության» հաստատման ու «կոնֆլիկտի էջը փակելու» մասին հայտարարություններից ընդամենը մի քանի օր անց Փաշինյանը, ըստ էության հայտարարեց, որ թյուր է կարծիքը, թե ՀՀ–ի հաշվին զիջումներ այլևս չեն լինելու։
«Հենց այդ նոր զիջումներին նախապատրաստելու համար էին հայտարարությունները, որ մեր վերահսկողության տակ դեռևս կան ադրբեջանական տարածքներ: Այսինքն՝ Փաշինյանը, իր իսկ խոսքով, «դարի պայմանագիրը» նախաստորագրելուց ընդամենը ժամեր անց ստիպված էր հայտարարել, որ դրանով մեր զիջումները չեն ավարտվում: Ավելին` Փաշինյանն, ըստ էության, հայտարարեց, որ ադրբեջանական զորքերը դուրս չեն գալու օկուպացված տարածքներից: Մինչդեռ ընդամենը մի քանի ամիս առաջ վարչախմբի ներկայացուցիչները հայտարարում էին, որ այդ հարցը լուծվելու է սահմանազատման ու սահմանագծման շրջանակներում»,– գրել է նա ֆեյսբուքյան էջում։
Իշխան Սաղաթելյանի կարծիքով` Փաշինյանն իր ուղերձով փակեց ադրբեջանական զորքերի դուրս բերման հարցը՝ դուռ բացելով նոր տարածքային զիջումներ համար: Ըստ նրա` Փաշինյանը գիտակցել է, որ Վաշինգտոնյան պայմանավորվածություններով չի կարողացել խաբել հանրությանը։
«Մարդիկ պարզ հարցեր են տալիս` ինչպե՞ս ենք խաղաղություն հաստատում, երբ մեր գերիները չեն վերադարձել, երբ ադրբեջանական զորքը ՀՀ տարածքում է, երբ չի քննարկվում Արցախի հայերի իրավունքների հարցը, որից էլ ծագել է այս ամբողջ հակամարտությունը։ Սրանք ամենաբնական հարցերն են, որոնք առաջինն են առաջանում մարդկանց մտքերում, երբ հայտարարում են, որ բացվել է «խաղաղության դարաշրջան»,– նշել է Սաղաթելյանը։
Պատգամավորն ասել է, թե Նիկոլ Փաշինյան փորձել է ներկայացնել , թե իր գործունեության հետ կապված հանրային ընդվզում չկա։ Այս համատեքստում հիշեցրել է 2022 –ին. 2024 թ ընդվզման ակցիաների ու այսօր իբրև հեղաշրջման կոչ անելու համար կալանավորված անձանց։
«Իրականում այս պայմանավորվածությունները ձեռք բերելու համար Փաշինյանը ստիպված է եղել Հայաստանում բանտերը լցնել քաղբանտարկյալներով, արշավ իրականացնել եկեղեցու, ընդդիմադիր բոլոր ուժերի և կառույցների նկատմամբ: Միշտ կարելի է ուժային ռեսուրսներով ճնշել բողոքի խաղաղ գործողությունները, բանտերը լցնել ընդդիմախոսներով ու հայտարարել, որ քո վարած քաղաքականության դեմ բողոք չկա»,– ընդգծել է Իշխան Սաղաթելյանը:
Նիկոլ Փաշինյանը, ըստ Սաղաթելյանի, լռեց այն մասին, որ համաձայնագրի ստորագրումից անմիջապես հետո Ալիևը կրկնեց ՀՀ սահմանադրությունը փոխելու պահանջի մասին՝ այն անվանելով Փաշինյանի «տնային աշխատանք»: Լռեց նաև այն մասին, որ Ադրբեջանում մեկ վայրկյան չդադարեցին Հայաստանը ադրբեջանցիներով բնակեցնելու պահանջները: Սաղաթելյան ընդգծել է, որ Փաշինյանը հաստատեց` խաղաղություն բառն օգտագործելով խաղաղության չես ունենում։
Հիշեցնենք, որ ՀՀ վարչապետ Նիկոլ Փաշինյանն ուղիղ եթերում ժողովրդին հղած իր ուղերձում ասել էր, որ «ՀՀ ինքնիշխան տարածքներ կան, որոնք այսօր գտնվում են ադրբեջանական վերահսկողության ներքո, բայց կան ադրբեջանական ինքնիշխան տարածքներ, որ գտնվում են մեր վերահսկողության ներքո»։