Եռաբլուրում բացվում է «Արցախի կանչը» հուշահամալիրը:
«Արցախի ժողովրդի պահանջով և խնդրանքով է այս միտքը ծնվել։ Այն ծնվել է Արցախի նախագահ Սամվել Շահրամանյանի, Կարեն Սարգսյանի և Արցախի իշխանությունների այլ ներկայացուցիչների մոտ։ Ժողովուրդը գերեզման չունի, շատ ծանրությամբ եմ դա ասում, այս մարդիկ զրկիվել են իրենց տնից, տեղից, նաև՝ գերեզմաններից»,-լրագրողների հետ զրույցում ասաց «Հայրենիք» կուսակցության նախագահ Արթուր Վանեցյանը։
Հարցին, թե ինչ միջոցներով է կառուցվել հուշակոթողը՝ Արթուր Վանեցյանը պատասխանեց. «Իմ ընտանիքի անձնական միջոցներով»։
«Հայրենիք» կուսակցության նախագահն ասաց նաև, թե իշխանությունները փորձել են խոչընդոտել «Արցախի կանչը» հուշահամալիրի բացման միջոցառումը։
«Իշխանությունն ասում է՝ Ալիևը կջղայինանա։ Մեզ բանավոր տեղեկացրել են, որ չգաք, բացումն այսօր չանեք, հետո ասել են, թե ուժ են կիրառելու, բայց հետո, երևի, հասկացել են, որ նման քայլի գնալը շատ սխալ կլինի իրենց կողմից, փոքր վատություն են արել՝ հոսանքն են անջատել և չեն թողել, որ այստեղ բարձրախոս տեղադրեն, որպեսզի զոհվածների ընտանիքի անդամներն իրենց խոսքն ասեն»,-ասաց Արթուր Վանեցյանը։