Մոսկվան կարծում է, որ Բաքվի կողմից Ռուսաստանի քաղաքացիների ազատ արձակումը կարևոր քայլ կլինի կողմերի միջև հարաբերությունների կարգավորման ճանապարհին, հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
Նրա խոսքով, Ռուսաստանը դիմել է Ադրբեջանում ձերբակալված իր հայրենակիցներին՝ հյուպատոսական աշխատակիցների այցելության թույլտվություն ստանալու և նրանց առողջական վիճակի մասին տեղեկություն ստանալու համար, սակայն Բաքուն դեռ համաձայնություն չի տվել։
«Չորրորդ հանդիպման (Ձերբակալվածների հետ հյուպատոսական աշխատակիցների – խմբ․) համար հարցում է ուղարկվել, սակայն ադրբեջանական կողմը դեռ համաձայնություն չի տվել։ Մենք ելնում ենք նրանից, որ այդպիսի համաձայնություն կստացվի»,- իր ճեպազրույցում ասել է Զախարովան՝ պատասխանելով ՌԻԱ Նովոստիի հարցին։
Բացի այդ, նրա խոսքով, հուլիսի 2-ին հարցում է ուղարկվել կալանավորվածների առողջական վիճակի և նրանց բժշկական օգնություն ցուցաբերելու վերաբերյալ։ «Ցավոք, մենք դեռևս պատասխան չենք ստացել։ Մենք նույնպես ենթադրում ենք, որ այն կստանանք», – հավելել է Զախարովան։