Ուկրաինայի նախագահ Վլադիմիր Զելենսկին մեղադրել է Ռուսաստանին Լեհաստանի օդային տարածքը խախտելու մեջ՝ դա անվանելով էսկալացիայի նոր մակարդակ։ Նա այս մասին գրել է իր Telegram ալիքում։
Նրա խոսքով՝ «առնվազն ութ հարձակողական անօդաչու թռչող սարք» ուղղված է եղել Լեհաստանի վրա։
«Սա չափազանց վտանգավոր նախադեպ է Եվրոպայի համար», -կարծում է Զելենսկին։ Նա իրավիճակը անվանել է «էսկալացիայի ևս մեկ փուլ», երբ օբյեկտները գործել են «ՆԱՏՕ-ի օդային տարածքում»։
Զելենսկին նաև ասել է, որ Ռուսաստանը պետք է «զգա հետևանքները»։
«Պատժամիջոցների դադարը չափազանց երկար է ձգձգվել։ Ռուսաստանի և նրա հանցակիցների դեմ սահմանափակումների ներդրման հետաձգումը միայն կբարձրացնի հարվածների դաժանությունը», – գրել է նա։
Լեհաստանի վարչապետ Դոնալդ Տուսկը հայտարարել է, որ երկրի օդային տարածքը խախտվել է սեպտեմբերի 10-ի գիշերը։ Լեհական լրատվամիջոցները հայտնել են, որ չորս օդանավակայաններ, այդ թվում՝ Վարշավայում, ժամանակավորապես դադարեցրել են գործունեությունը պետական անվտանգության ապահովման հետ կապված չպլանավորված ռազմական գործունեության պատճառով։