«Ինձ դատարան են բերել լոկ նրա համար, որ մարդկանց հողատարածքներ եմ տվել, որ մարդիկ բնակարաններ, կենցաղսպասարկման օբյեկտներ կառուցեն»,- այսօր Հակակոռուպցիոն դատարանի մոտ լրագրողների հետ զրույցում ասաց Գյումրիի քաղաքապետ Վարդան Ղուկասյանը։
Ըստ նրա, երկրաշարժ տեսած քաղաքապետը եթե նմանատիպ գործելաոճ չի ձեռնարկում, պետք է վռնդեն քաղաքապետարանից, քաղաքից։
Հարցին՝ իր որդին Սրբազանի դատին մասնակցելու համար է հայտնվել իրավապահների ուշադրության կենտրոնում, Ղուկասյանը պատասխանեց. «Երբ գնաց Սրբազանի դատին, ես իրեն ասացի՝ քեզ անպայման կկալանավորեն, գլխիդ մի բան կանեն»։
Պատասխանելով հարցին՝ մտահոգությունի չունի՞, որ այս քայլերով կարող են իրեն ստիպել հրաժարական տա, Վարդան Ղուկասյանն ասաց. «Ես այդ տեսակը չեմ, վախեցողներից չեմ, ինչ ուզում են անեն, ոնց ուզում են անեն, ամեն տեղն էլ տղամարդու տեղ է։
«Դատարանից հույս չկա, բայց ես միանշանակ հավատում եմ Աստծո դատաստանին: Ես մի բան գիտեմ՝ յուրաքանչյուր դատավոր, յուրաքանչյուր դատաիրավական ոլորտի ներկայացուցիչ, եթե իրենց հանձնարարական են տալիս, իրենք պետք է ասեն՝ սա անելու բան չէ, ոնց անենք: Կփոխվի այդ ամեն ինչը, հետո ձեր աշխատավարձի համար մարդկանց տները քանդում եք, դուք Աստծուց չե՞ք վախենում: Օրենքը պահե՛ք, ճշմարտությամբ առաջնորդվե՛ք»,- նշեց նա:
Իմ հայրենիքի համար ամեն ինչի պատրաստ եմ։ Ինձ ընդհանրապես պետք չէ այս հասակում պետական կառույցում աշխատել, ուզում եմ հանգիստ ապրել, բայց տեսնում եմ, որ երկիրը վտանգի մեջ է, երկիրը տանում են թուրքացման»։