Թուրքիայի նախագահ Ռեջեփ Թայիփ Էրդողանը հայտարարել է, որ Իսրայելի «խոստացված հողերի» հայեցակարգի վրա հիմնված պնդումները «իրավաբանորեն անվավեր են և չունեն որևէ լեգիտիմություն»՝ այդ երկրի ղեկավարությանը որակելով «մարդասպանների ցանց», որը ղեկավարվում է ֆաշիստական գաղափարախոսությամբ, գրում է Turkiye today-ը։
Դոհայում Իսլամական համագործակցության կազմակերպության (ԻՀԿ) և Արաբական պետությունների լիգայի արտակարգ գագաթնաժողովին մասնակցելուց հետո ինքնաթիռում լրագրողների հետ զրույցում Էրդողանն Իսրայելի վարչապետ Բենիամին Նեթանյահուին և նրա կառավարությանը մեղադրել է «սիոնիզմը որպես ագրեսիայի քողարկում օգտագործելու մեջ»։
«Իսրայելը ծառայում է ոչ թե կրոնին, այլ այլասերված գաղափարախոսությանը։ Նեթանյահուն և նրա ավազակախումբն աշխարհին պատմում են միայն սիոնիզմի մասին հորինված հեքիաթներ։ ՄԱԿ-ի կանոնադրությունը հրամայում է հարգել պետությունների տարածքային ամբողջականությունը, ինքնիշխան հավասարությունը և սահմաններն ուժով փոխելու արգելքը։ Մենք պետք է ճանաչենք սա։ Հետևաբար, «խոստացված հողերի» հայեցակարգով ստեղծված սցենարներն իրավաբանորեն անվավեր են և զուրկ են լեգիտիմությունից։ Իսրայելը կառավարողները ոչ այլ ինչ են, քան մարդասպանների ցանց, որն իր արմատական մտածելակերպը վերածել է ֆաշիստական գաղափարախոսության», – ասել է Էրդողանը։
Բացի այդ, Թուրքիայի նախագահը Նեթանյահուին համեմատել է Ադոլֆ Հիտլերի հետ։ «Ինչպես Հիտլերը, կուրացած այն բանից, ինչը նա առաջընթաց էր համարում, չէր կարող կանխատեսել իրեն սպասող պարտությունը, այնպես էլ Նեթանյահուն, ի վերջո, նույն ճակատագրին կարժանանա։ Ես հավատում եմ դրան»,- հայտարարել է Էրդողանը։ Նա հավելել է, որ Իսրայելի գործողությունները վնասել են ոչ միայն մահմեդականներին և քրիստոնյաներին, այլև հրեաներին։
«Երբ լսում ես հրեաներին, ովքեր դեմ են Իսրայելի ցեղասպանություններին, հստակ տեսնում ես, թե որքան վտանգավոր գաղափարախոսություն է սիոնիզմը։ Եթե սիոնիստական Իսրայելը պետք է կապված լինի ինչ-որ բանի հետ, դա ահաբեկչությունն ու ֆաշիզմն են»,- նշել է Թուրքիայի ղեկավարը։ Նա մատնանշել է Նյու Յորքի հռչակագիրը, որն ընդունվել է ՄԱԿ-ի Գլխավոր վեհաժողովում 142 երկրների կողմից, որպես Իսրայելի աճող մեկուսացման ապացույց։ «Երկու պետությունների լուծման թեզը, որը Թուրքիան տարիներ շարունակ պաշտպանել է բոլոր հարթակներում, այժմ դարձել է համաշխարհային մեծամասնության ընդհանուր կամքը»,- ասել է Էրդողանը՝ հավելելով, որ Պաղեստին պետության ճանաչումը Արևմուտքի կողմից այս ամսվա վերջին ՄԱԿ-ի գագաթնաժողովում «կխոչընդոտի Իսրայելին»։
Էրդողանի խոսքերը հաջորդում են Կատարում անցկացված արաբա-իսլամական գագաթնաժողովին, որը գումարվել էր անցյալ շաբաթ Դոհայում ՀԱՄԱՍ-ի առաջնորդների վրա Իսրայելի կողմից իրականացված օդային հարվածներից հետո։ Հարձակման ժամանակ զոհվել են ՀԱՄԱՍ-ի հինգ անդամներ և Կատարի անվտանգության ծառայությունների մեկ սպա, երբ խումբը քննարկում էր ԱՄՆ-ի ներկայացրած հրադադարի առաջարկը։ Գագաթնաժողովի եզրափակիչ հայտարարությունը, որը հրապարակվել է Կատարի պաշտոնական լրատվական գործակալության կողմից, դատապարտել է հարվածները և զգուշացրել, որ Իսրայելի ագրեսիան «խաթարում է տարածաշրջանում խաղաղության հասնելու ցանկացած հնարավորություն», միաժամանակ, սպառնալով տարածաշրջանային և միջազգային անվտանգությանը։
Հիշեցնենք, որ նախօրեին գագաթնաժողովում ունեցած ելույթում Էրդողանը կոչ էր արել Իսրայելի դեմ համապարփակ տնտեսական պատժամիջոցներ կիրառել։