ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևն արձագանքել են ԱՄՆ նախագահ Դոնալդ Թրամփի գրառմանը։
ԱՄՆ նախագահը X սոցիալական ցանցում հրապարակել է երեք առաջնորդների՝ Վաշինգտոնում արված լուսանկարն ու կից գրել. «Մեծ պատիվ է օգնել կարգավորել պատերազմն Ադրբեջանի և Հայաստանի հետ ու միևնույն ժամանակ ընկերանալ այս երկու մեծ առաջնորդների և մարդկանց՝ նախագահ Իլհամ Ալիևի և վարչապետ Նիկոլ Փաշինյանի հետ։ Սա հավերժական բարեկամություն կլինի ինձ համար, բայց ավելի կարևորը՝ Ամերիկայի Միացյալ Նահանգների համար»։
Փաշինյանը շնորհակալություն է հայտնել Թրամփին։
«Կրկին շնորհակալություն եմ հայտնում Ադրբեջանի հետ այդ պատմական համաձայնագրի կնքման միջնորդության համար, ինչին դեռ ոչ ոք չէր հասել։ Վերահաստատում եմ իմ հանձնառությունը խաղաղության ինստիտուցիոնալացման և TRIPP-ի իրականացման հետագա աշխատանքներին»,- գրել է Փաշինյանը:
Ալիևն էլ Թրամփին արձագանքել է մեկ այլ լուսանկարով, որում ինքն ու Փաշինյանն են, իսկ նրանց հետևում՝ ԱՄՆ նախագահի նկարը։ Ալիևը գրել է, որ բարձր է գնահատում Թրամփի դերն Ադրբեջանի և Հայաստանի միջև խաղաղության գործընթացի առաջխաղացման և Վաշինգտոնի պատմական գագաթնաժողովը հյուրընկալելու համար։ Ալիևը Թրամփին անվանել է «հավերժական բարեկամության ճարտարապետ»։