Ուկրաինայի ռազմաօդային ուժերը հայտարարել են, որ Զապորոժիեի շրջանում խոցել են ռուսական Սու-34 կործանիչ-ռմբակոծիչ, փոխանցում է Current time-ը։ Ըստ տեղեկությունների՝ ինքնաթիռն ընկել է առավոտյան ժամը 4:00-ի սահմաններում: «Հայտնի է, որ ինքնաթիռն ահաբեկչական հարձակումներ է իրականացրել Զապորոժիե քաղաքի վրա՝ օգտագործելով ուղղորդվող ավիառումբեր»,- ասվում է Ուկրաինայի ռազմաօդային ուժերի հրամանատարության հայտարարության մեջ: Այլ մանրամասներ չեն հաղորդվում։
Ռուսական ուժերը հաճախակի են ինքնաթիռներ օգտագործում Զապորոժիե շրջանին հարվածներ հասցնելու համար: Սեպտեմբերի լույս 23-ի գիշերը ռուսական ուժերն ավիառումբ էին նետել Զապորոժիեի վրա, որի հետևանքով վնասվել էին բնակելի շենքեր և զոհվել էր մեկ մարդ:
Բացի այդ, Ուկրաինայի պաշտպանության նախարարության գլխավոր հետախուզական վարչությունը հաղորդում է Ռուսաստանի կողմից բռնակցված Ղրիմում երկու Ան-26 ինքնաթիռի և ափամերձ ռադիոլոկացիոն կայանների ոչնչացման մասին։ «Թերակղզում Ուկրաինայի ռազմական հետախուզության հատուկ նշանակության ուժերն այրել են ռուս երկու Ան-26 տրանսպորտային ինքնաթիռ, ինչպես նաև հարվածել թշնամու մակերևութային ռադիոտեղորոշիչ կայանը և ափամերձ МР-10М1 “Мыс М1” կայանը»,- ասվում է ուկրաինական հետախուզության մամուլի հաղորդագրության մեջ։
Ռուսաստանի իշխանությունները դեռևս չեն մեկնաբանել ուկրաինական կողմի տարածած այս տեղեկությունները։