«Red Wings» ավիաընկերությունը ստիպված է եղել փոխել Նիժնի Նովգորոդ-Երևան թռիչքն իրականացնող WZ-1347 չվերթի ինքնաթիռը:
Ինչպես արդեն տեղեկացրել ենք` այն ՌԴ ժամանակով 18:00-ին բարձրացել էր օդ ու Երեւան պետք է հասներ` Երեւանի ժամանակով սեպտեմբերի 26-ին` ժամը 22:40, սակայն թռիչքի ժամանակ պարզվել է, որ օդանավն ունի խնդիրներ ու ստիպված արտակարգ վայրէջք է կատարել Սամարայի օդանավակայանում։
«Փաստինֆո»-ն հայտնել է, որ, իմանալով խափանման մասին, ուղեւորների շրջանում խուճապ է սկսվել, որոշների ինքնազգացողությունը կտրուկ վատացել է: Դեպքի վայր է ժամանել շտապօգնության խումբ՝ անհրաժեշտ բժշկական օգնություն ցուցաբերելու համար։
Բարեբախտաբար, ինքնաթիռում գտնվել է նաև բժշկուհի, որը կարողացել է մինչ շտապօգնության ժամանումը առաջին օգնություն ցուցաբերել տուժած ուղևորներին։
Օդանավակայանում ուղևորները մնացել են օդանավի մեջ, բայց պարզվել է, որ ինքնաթիռի խնդիրները լուրջ են ու չի կարող օդ բարձրանալ: «Փաստինֆո»-ն ուղեւորներից տեղեկացավ, որ որոշում է կայացվել փոխել ինքնաթիռը ու չվերթն իրականացվել է այլ ինքնաթիռով: Բարեբախտաբար տուժածներ չկան: