Ամո՛թ մեզ, իմ սերնդակիցներին, ինձ, մեր պետությանը, որ պետականության պայմաններում զրկվեցինք մեր հայրենիքի մի մասից, Եռաբլուրում լրագրողների հետ զրույցում ասաց «Ժառանգություն» կուսակցության ղեկավար Րաֆֆի Հովհաննիսյանը։
Նրա խոսքով՝ այդ ամենի պատասխանատվությունն ընկնում է առաջին հերթին բռնապետ ոսոխների՝ թշնամիների վրա, ովքեր բռնի ուժով փորձեցին խեղդել հայ ժողովրդի ազատության և ինքնորոշման արդար պահանջը. «Բայց, ինչպես տեսել ենք վերջին տարիների ընթացքում, ինչպես նաև վերջերս խոստովանվեց՝ ուղիղ մեղսակցություն ունեն այն իշխանությունները, ովքեր այսօր նստած են աթոռին։ Ռուս բարեկամների մեղսակցությամբ, միջազգային հանրության, Արևմուտքի լավ խոսքերով հասանք այս օրին։ Կա՛մ պետք է այդ ամենը ուղղենք՝ հույսը չկտրելով, որ կվերականգնվենք, կա՛մ էլ Եռաբլուրի այս սուրբ դարպասների մոտ ամեն տարի հանդիպենք»։
Նրա դիտարկմամբ՝ անցյալի սխալներն են այս ամենին բերել.«Մենք կարող էինք այնպիսի Հայաստանի Հանրապետություն կերտել, որ չհասնեինք այս օրվան»։