«25-օրյա վարժական հավաքների հետ կապված կան մեծագույն պրոբլեմներ, որովհետև խուսափումները շատ են, և դրան նպաստում է անվստահությունը, անպաշտպանվածությունը, 25 օր իր աշխատավայրից զրկվելը, ոչ գրանցված աշխատանքից զրկվելը, ընտանիքից զրկվելը և բազմաթիվ պրոբլեմները, որ 25-օրյա վարժական հավաքից վերադարձածները պատմում են իրենց ընկերներին»,-ԱԺ-ում հայտնեց «Հայաստան» խմբակցության պատգամավոր Գեղամ Մանուկյանը։
Նա հանդես եկավ կառավարության ներկայացրած օրինագծի վերաբերյալ, որով խստացվում են վարժական հավաքներից խուսափելու համարա ՔՕ-ում սահմանված պատժամիջոցները։
Մանուկյանի խոսքով, 25 օրյա վարժական հավաքները մարտական հերթապահություն է, ոչ թե վարժական նպատակներով հավաք։
«Վարժական հավաքների ներքո քաղաքական պատվերներով տասնյակ մարդիկ զորակոչվեցին Անդրանիկ Քոչարյանի կոչով, հիշում եք հայտնի դեպքերը»,-ասաց ընդդիմադիր պատգամավորը։
Ըստ Գեղամ Մանուկյանի, գյուղից վարժական հավաքների շատ ավելի պարտաճանաչ են գնում, քան Երևանից։
«Մի քանի ամիս առաջ բազմաթիվ քաղաքացիներից ահազանգեր կային, որ վարժական հավաքից հետո, ասում էին՝ 42 հազար պահելու ենք ֆորմի համար: Ահազանգն եղավ, հարցը ոնց որ կարգավորվեց»,- ԱԺ-ում ելույթի ժամանակ հայտարարեց «Հայաստան» խմբակցության պատգամավոր Գեղամ Մանուկյանը: «Հիմա էլ ֆորմեն որ տալիս են, ասում են՝ աչքի լույսի պես 3 տարի պետք է կպահես»,- հավելեց պատգամավորը:
«Լավ օրից չի որ այս վարժական հավաքները կան, որովհետև մարտական հերթապահության պրոբլեմ կա, որովհետև 15 օրվա փոխարեն էսօր զինվորը 2-3 ամիս կանգնում է մարտական հենակետում, որ ինքնին պրոբլեմ է։ Եվ, թող ոչ մեկ չհոխորտա որ պայմանագրային զինծառայողներով մեր զինված ուժերը լցված են, ոչ վարժական հավաքները էդ բացը լրացնելու համար են։ Վաղը, եթե թիվը չհերիքեց մարտական հերթապահության, ավելի շատ մարդ են տանելու վարժական հավաքների ու էդ բոլոր պրոբլեմները չլուծած»,-ասաց նա։