Շատ հստակ ֆիքսված է, որ ՀՀ վարչապետը և Ադրբեջանի նախագահն ի թիվս այլ հարցերի քննարկել են նաև Հայաստանի տարածքով անցնող « TRIPP ուղի» ենթակառուցվածքային ծրագրի հետ կապված հարցեր և, կարծում եմ, սրանով կարելի է հարցը փակված համարել։ Այս մասին հայտարարել է ՀՀ ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանն անդրադառնալով «Զանգեզուրի միջանցք» եզրույթին, որն իր խոսույթում օգտագործում է Իլհամ Ալիևը։
Խանդանյանի կարծիքով՝ ՀՀ-ն և Ադրբեջանը նույն կերպ են անվանում այն ենթակառուցվածքային ծրագիրը, որը անցնում է ՀՀ տարածքով։
«Հայաստանի տարածքից դուրս այլ նախագծեր, ճանապարհներ, միջանցքներ այլ երկրները ինչպես ցանկանում են թող անվանեն։ Մենք գիտենք մեր տարածքով անցնող նախագծերի անվանումները մեր ապաշրջափակման և ենթակառուցվածքների զարգացման համալիր ծրագիրը կոչվում է խաղաղության խաչմերուկ, իսկ այն ենթակառուցվածքային ծրագիրը, որը Հայաստանը իրականացնելու է Միացյալ նահանգների հետ, կոչվում է Թրամփի ուղի հանուն միջազգային զարգացման և խաղաղության։ Ինձ՝ որպես ՀՀ պաշտոնյա, հետաքրքրում է միայն, որ ր ՀՀ տարածքում բոլոր անվանումները նշվեն և հնչեն այնպես, ինչպես կան»,- հայտարարեց Խանդանյանը ճեպազրույցի ժամանակ։
Լրացնելով իր գործընկերոջը ԱԺ «Քաղաքացիական պայմանագիր» խմբակցության քարտուղար Արթուր Հովհաննիսյանն ասաց, որ կան պաշտոնական ստորագրված փաստաթղթեր, որտեղ կան հստակ նշված անուններ, պայմանավորվածություններ։
«Մենք ելնում ենք պաշտոնական փաստաթղթերից և պայմանավորվածություններից։ Մնացած բոլոր խոսույթնրը չեն կարող լեգիտիմ լինել, եթե վերաբերելի են ՀՀ սուվերեն որևէ տարածքի, բայց արդեն մենք նշեցինք, որ երկու երկրները նույն հաղորդագրությունն են տարածել առ այն, որ ՀՀ սուվերեն տարածքով անցնող ճանապարհն ունի TRIPP ուղի անվանումը և որևէ մեկը չի խոսում ՀՀ տարածքով անցնող ճանապարհի վերաբերյալ և չի կարող խոսել։ ՀՀ-ն է որոշում իր սուվերեն տարածքում գտնվող տեղանունները, Ադրբեջանն էլ որոշում է իր սուվերեն տարածքում գտնվող ճանապարհների, քաղաքաների տեղանունները»,- ասաց Հովհաննիսյանը։