44-օրյա պատերազմի հանգամանքներն ուսումնասիրող հանձնաժողովի զեկույցի նախաբանի ու եզրափակիչ մասի ընթերցումից հետո ՀՀ ԱԺ «Պատիվ ունեմ» խմբակցության քարտուղար Տիգրան Աբրահամյանի մոտ տպավորություն է՝ եթե այն Նիկոլ Փաշինյանը չի գրել, ապա ակնհայտորեն խմբագրել է:
«Այն տերմինաբանությունն ու համայն աշխարհին ուղղված մեղադրանքները, պիտակավորումները, որոնք արտացոլված են զեկույցում, այս տարիներին հնչեցվել ու տեղ են գտել Փաշինյանի և նրան պատկանող մի քանի լրատվամիջոցների բառապաշարում»,- ֆեյսբուքյան իր էջում գրել է պատգամավորը՝ հավելելով՝ պարզ է, թե ինչու այն չի հրապարակվել։
Նրա խոսքով՝ չնայած Փաշինյանը փորձել է պարտության պատասխանատվությունը բաշխել բանակի, ներքին և արտաքին ուժերի վրա և այլն, սակայն նույնիսկ այս փաստաթղթում է ակնհայտ, որ աղետալի այս էջի ու որպես հետևանք դրան հաջորդած պարտությունների շղթայի գլխավոր պատասխանատուն հենց Նիկոլ Փաշինյանն է:
«Հասկանալի է, որ իշխանությունը հստակ գիտի, որ իր որոշումները, ուշացումով հակաքայլերը, իսկ որոշ դեպքերում` քաղաքական որոշումների բացակայությունները մեր երկրին դիվանագիտական, քաղաքական, ռազմական առումով հրել են դեպի դաժան պարտության»,- գրել է Աբրահամյանը։
Ըստ նրա՝ չնայած զեկույցում ներկայացված են տարբեր ստորաբաժանումների գործողությունները, մարտադաշտն ինքնակամ լքելու դեպքերը և այլն, սակայն, միևնույն է, փաստաթղթում հստակ արտացոլված է այն հանգամանքը, որ հավաքական առումով բանակը համառ կռիվ է տվել, շատ դեպքերում` խիստ անհավասար պայքարում։
Պատգամավորը շեշտում է՝ այսպիսի բանակով պարտվել հնարավոր էր միայն քաղաքական ղեկավարության լիակատար տապալումների, ռազմաքաղաքական իրադրության սխալ գնահատումների, դիվանագիտական ձախողումների և երկրի անվտանգության ապահովման ուղղությամբ քայքայիչ գործողությունների պայմաններում: