ՆԱՏՕ-ի գլխավոր քարտուղար Մարկ Ռյուտեն ծաղրել է Ռուսաստանին՝ Ֆրանսիայի ափերի մոտ հայտնաբերված ռուսական, ենթադրաբար, անսարք ռազմական սուզանավի համար, փոխանցում է DW-ի ռուսական ծառայությունը։ «Միջերկրական ծովում այժմ ռուսական ռազմածովային ներկայություն գրեթե չի մնացել։ Միայն միայնակ, կոտրված ռուսական սուզանավն է պարեկությունից հետո տուն վերադառնում»,- ասել է Ռուտտեն՝ ելույթ ունենալով Սլովենիայում։
ՆԱՏՕ-ի գլխավոր քարտուղարը նաև հիշատակել է Թոմ Քլենսիի 1984 թվականի «Կարմիր հոկտեմբերի որսը» վեպը, որը պատմում է դավադիրների կողմից առևանգված խորհրդային միջուկային սուզանավի որոնումների մասին։
«Ինչպես է ամեն ինչ փոխվել»,- նշել է Ռյուտեն։ Հոկտեմբերի 9-ին ՆԱՏՕ-ի ռազմածովային ուժերի օպերատիվ խումբը հայտնել էր, որ թևավոր հրթիռներով զինված ռուսական «Նովոռոսիյսկ» սուզանավը դուրս է եկել ֆրանսիական Բրետանի ափերի մոտ, իսկ հետագայում վերցվել Դաշինքի հսկողության տակ։ Հոլանդական Nl Times-ի տվյալներով՝ սուզանավը մարտական հերթապահություն էր իրականացնում Միջերկրական ծովում, երբ վառելիքի արտահոսք է տեղի ունեցել։
ВЧК-ОГПУ տելեգրամ ալիքը, որը, ենթադրաբար, մոտ է Ռուսաստանի անվտանգության ուժերին, հայտնել է, որ սուզանավի խնդիրը հայտնաբերվել է սեպտեմբերի վերջին. վնասվածքի պատճառով դիզելային վառելիքը սկսել է արտահոսել նավամատույց։ Ռուսաստանի Սևծովյան նավատորմի մամուլի ծառայությունը, սակայն, հերքել էր խափանման և սուզանավի դուրս գալու մասին հաղորդագրությունները։ Նրանք հայտարարել էին, որ «Նովոռոսիյսկ»-ը Մեծ Բրիտանիայի և Ֆրանսիայի միջև անցնում էր Լա Մանշով՝ «միջազգային նավարկության կանոնակարգերին համապատասխան»։