«Արագածոտնի թեմի առաջնորդ Մկրտիչ եպիսկոպոս Պռոշյանը բռնի անհետացած է»,- Panorama.am-ի հետ զրույցում այս մասին հայտնեց փաստաբան Արմինե Ֆանյանը։
Նա նշեց, որ պետության թողտվությամբ կամ պատվերով, կամ հենց պետության կողմից իրականացված գործողություններով իրավական պաշտպանությունից դուրս է մնացել, որովհետև նրա գտնվելու վայրը չգիտեն։
«Նրա բնակարանում իրականացվել է խուզարկություն, Սրբազանը խուզարկությունն իրականացրած քննիչի հետ դուրս է եկել քննիչի ուղեկցությամբ։ Մեզ հրաժարվում են տեղեկություն տալ, թե որտեղ է՝ պատճառաբանելով որ չգիտեն։
Սա կոչվում է բռնի անհետացում, քրեորեն հետապնդելի արարք է։ Փաստացի Սրբազանը այսքան տևական ժամանակ զրկված է իրավական պաշտպանության հնարավորությունից»,- ասաց Ա. Ֆանյանը։
Հիշեցնենք, որ անցած գիշեր Արագածոտնի թեմի բարձրաստիճան հոգևորականներ են տարվել Քննչական կոմիտե։ Խուզարկել են Արագածոտնի թեմի առաջնորդ Մկրտիչ եպիսկոպոս Պռոշյանի տունը, ապա նրան տեղափոխել են ՔԿ։ Արագածոտնի թեմի առաջնորդը Ամենայն հայոց կաթողիկոս Գարեգին Բ-ի քրոջ որդին է:
Մկրտիչ եպիսկոպոս Պռոշյանի գտնվելու վայրն այս պահին անհայտ է։ Panorama.am-ի հետ փաստաբան Մարինե Ֆարմանյանն ավելի վաղ հայտնել էր, որ այդ մասին իրենք ահազանգել են ՄԻՊ-ին, պատրաստվում են դիմել նաև ոստիկանություն։