ՀՀ ազգային անվտանգության ծառայությունը մտել է Գյումրու քաղաքապետարան։ Այս մասին հայտնում են InfoPort.am-ի աղբյուրները:
Ոստիկանները փակել են քաղաքապետարանի մուտքն ու թույլ չեն տալիս քաղաքապետարանի աշխատողներին մտնել կամ դուրս գալ շենքից: Քաղաքապետարանի մուտքի մոտ հավաքվել են քաղաքապետ Վարդան Ղուկասյանի աջակիցները: Այս պահին համայնքային ենթակայության երկու ջրցան մեքենաներ փակել են հրապարակի մուտքը, տեղակայավել են նաև ոստիկանական ուժեր:
Քննչական կոմիտեից ի պատասխան մեր հարցման հաստատեցին, որ Գյումրու քաղաքապետարանում քննչական գործողություններ է իրականացնում Հակակոռուպցիոն կոմիտեն քրեական վարույթի շրջանակներում: Կոմիտեից հայտնեցին նաև, որ այս պահին այլ տեղեկություն չեն կարող հրապարակել, խոստացան` ավելի ուշ հայտարարություն տարածել։
Մամուլում շրջանառվող լուրերի համաձայն՝ ձերբակալվել է Գյումրիի քաղաքապետ Վարդան Ղուկասյանը։ Վարդան Ղուկասյանին ձերբակալելու լուրի վերաբերյալ Հակակոռուպցիոն կոմիտեից նշեցին, որ դրա հետ կապված մեկնաբանությամբ հանդես կգան ավելի ուշ։
Հիշեցնենք նաև, որ հոկտեմբերի 7-ին Գյումրու քաղաքապեը Վարդան Ղուկասյանն ահազանգել էր իր ու իր ընտանիքի անդամների դեմ իրականացվող հետապնդումների մասին։ Նա դիմել էր նաև ընտրողներին.
«Դիմում եմ իմ ընտրողներին, ընդդիմադիր բոլոր կուսակցություններին, ես մինչև վերջ պահելու եմ ինձ, չեմ կոտրվելու միանշանակ, գիտեք իմ բնավորությունը, ինչքան նման բաներ անեն, մենք կդառնանք ավելի համարձակ։ Ձեր ձայնը հելեք պաշտպանեք, մի թողեք իմ վրա, ես ձեզ կուրսի եմ պահում։ Պետք է, որ ինձ հետ կապի մեջ լինեք, որևէ ոտնձգություն, մենք տեղյակ կպահենք։ Հենց ձեզ տեղյակ պահեցի, լցվում եք իմ կողքը։ Հակադեմոկրտական պահվածքն ինձ ստիպում է, որ ես դրանց դեմ ավելի ուժեղ գործունեություն ծավալեմ օրենքի սահմաններում միանշանակ»։