«Թուրքիայի հետ Հայաստանի ծավալած դրական երկխոսությունը հույս է տալիս, որ մենք առաջիկայում կարող ենք նաև Հայաստան-Թուրքիա սահմանի բացում ունենանք»,- Թբիլիսիում ընթացող «Մետաքսի ճանապարհ» համաժողովի ընթացքում ասաց Նիկոլ Փաշինյանը։
Միաժամանակ նշեց, որ Հայաստանը ոչ միայն քաղաքական, այլև տեխնիկական առումով պատրաստ է հենց այսօրվանից ՀՀ-ի տարածքով ապահովել բեռնատար ավտոմեքենաների տարանցումը Թուրքիայից դեպի Ադրբեջան և Ադրբեջանից դեպի Թուրքիա:
«Հայաստանի տարածքում թե ճանապարհները, թե սահմանային ենթակառուցվածքները պատրաստ են սրա համար՝ Մարգարա-Եղեգնաձոր-Սիսիան-Գորիս երթուղով»,- ասաց Փաշինյանը։
Նրա խոսքով, քաղաքական առումով պատրաստ են նույնկերպ ապահովել Նախիջևանի ինքնավար հանրապետությունից դեպի Ադրբեջանի հիմնական մաս և հակառակ ուղղությամբ տարանցումը Հայաստանի տարածքով, բայց տեխնիկապես դեռևս պատրաստ չեն՝ ենթակառուցվածքների բացակայության պատճառով:
«Քաղաքական առումով պատրաստ ենք նաև երկաթուղային տարանցում ապահովել Թուրքիայի և Նախիջևանի ինքնավար հանրապետության միջև, ինչպես նաև Թուրքիայի և Ադրբեջանի միջև, բայց այդ հատվածներում երկաթուղին նորոգման կամ վերակառուցման կարիք ունի:
Համոզված եմ և վստահ եղեք, այս տեխնիկական հարցերը երկու-երեք տարվա ընթացքում կլուծվեն»,- ասաց Փաշինյանը:
Նա հայտարարեց, որ առաջիկայում Հայաստանի տարածքով Ադրբեջանից դեպի Նախիջևան, նաև Ադրբեջան-Հայաստան-Թուրքիա խողավակաշարեր, էլեկտրահաղորդման գծեր նույնպես կկառուցվեն։